Վաշինգտոնում ԱՄՆ նախագահ Բարաք Օբամայի հետ մամուլի ասուլիսի ժամանակ (որը հեռարձակում էր «CNBC»–ը) Ֆրանսիայի նախագահ Ֆրանսուա Օլանդը հանդես է եկել Թուրքիայի և Սիրիայի սահմանը փակելու կոչով։ Այդ սահմանով է, ըստ Օլանդի, իրականանում տարբեր խմբավորումների ահաբեկիչների անվերահսկելի երթևեկությունը։

«Մենք պետք է ոչնչացնենք ԻԼԻՊ–ի ահաբեկիչներին, որտեղ էլ որ նրանք լինեն։ Մենք պետք է վերացնենք նրանց ֆինանսավորող աղբյուրները, գտնենք և վնասազերծենք նրանց առաջնորդներին, ոչնչացնենք այդ հանցավոր խմբավորման ենթակառուցվածքները։ Մենք պետք է ուժեղացնենք մեր գործողությունները Սիրիայում և Իրաքում։ Առաջնահերթություններից մեկն էլ Սիրիայում ԻԼԻՊ–ի զավթած կարևոր օբյեկտների գրոհումն է։ Բացի այդ, հարկավոր է փակել Թուրքիայի և Սիրիայի սահմանը՝ կանխելու ահաբեկիչների մուտքը Եվրոպա և այլ երկրներ»,–ասել է Օլանդը։

Օբաման էլ իր հերթին կոչ է արել թույլ չտալ Су-24–ի խոցումից հետո ՌԴ և Թուրքիայի միջև առաջացած հակամարտության էսկալացիան։

«Հուսով եմ՝ այս պահին բոլոր կողմերն էլ կարող են հետքայլ անել և կողմնորոշվել՝ ինչպես ավելի լավ պաշտպանել սեփական շահերը»,– Օբամայի խոսքերն է մեջբերում «ՏԱՍՍ»–ը։

Օբաման նաև շեշտել է՝ Թուրքիան իրավունք ունի պաշտպանել իր տարածքը՝ հավելելով, որ մոտ ժամանակներս նախատեսում է խոսել թուրք առաջնորդի հետ։

ՌԴ գործողությունները Սիրիայում Օբաման որակել է «խնդրահարույց»՝ հավելելով, որ Սիրիայում ՌԴ ռազմավարության փոփոխությունը հսկայական պոտենցյալ կստեղծի ԱՄՆ–ի հետ համագործակցության համար։

ՌԴ և Թուրքիայի հակամարտության էսկալացիայի անթույլատրելիության մասին է խոսել նաև Օլանդը։

«Չպետք է մոռանալ, որ մեր բոլորի՝ Ֆրանսիայի, Թուրքիայի և ՌԴ–ի թշնամին ԻԼԻՊ–ն է»,–ասել է Օլանդը՝ շեշտելով, որ միջազգային հանրությունը պետք է միավորվի ԻՊ դեմ պայքարում.

«Մենք պետք է հարվածներ հասցնենք ամենուր, որտեղ ԻՊ–ն է, գրոհենք այն տարածքները, որոնք գտնվում են զինյալների վերահսկողության տակ»։

Օլանդը մեկ անգամ ևս հիշեցրել է, որ Ֆրանսիան ցամաքային գործողություն չի ծրագրում Սիրիայում։

7or.am