Տնտեսական

15.12.2015 16:45


Պարզաբանում պետական պատվերի շրջանակում տրամադրվող բժշկական օգնության կազմակերպման և քաղաքացիների հերթագրման կարգի վերաբերյալ

Պարզաբանում պետական պատվերի շրջանակում տրամադրվող բժշկական օգնության կազմակերպման և քաղաքացիների հերթագրման կարգի վերաբերյալ

Պետական պատվերի շրջանակներում պետության կողմից երաշխավորված անվճար և արտոնյալ պայմաններով տրամադրվող բժշկական օգնության և սպասարկման ծառայությունների կազմակերպումը և քաղաքացիների հերթագրումը կանոնակարգվում են ՀՀ կառավարության 2004 թվականի մարտի 4-ի N 318-Ն որոշմամբ:

Այդ որոշման Հավելված 2-ը սահմանում է պետության կողմից երաշխավորված անվճար և արտոնյալ պայմաններով բժշկական օգնության և սպասարկման ֆինանսավորման կարգը, համաձայն որի 14-րդ կետի` կազմակերպությունների պայմանագրային գումարների ամսական համամասնությունների գերազանցման դեպքում պետության կողմից երաշխավորված անվճար և արտոնյալ պայմաններով բուժօգնություն ստանալու իրավունք ունեցող անձանց անհրաժեշտ բժշկական օգնությունը և սպասարկումը կազմակերպվում է հերթագրման եղանակով։ Իսկ հերթագրման կարգը սահմանվում է որոշման 4-րդ հավելվածով:

Բնակչության հերթագրման կարգի 1-ին կետի համաձայն բժշկական օգնություն և սպասարկում իրականացնող բժշկական կազմակերպություններում պետության կողմից երաշխավորված անվճար և արտոնյալ պայմաններով բժշկական օգնության և սպասարկման շրջանակներում ծառայություններն իրականացվում են տվյալ կազմակերպության տարեկան պայմանագրային գումարի շրջանակներում՝ տվյալ ծրագրի ամսական կտրվածքով հաստատված համամասնությունների չափով:

Նույն որոշման Հավելված 4-ով հաստատված կարգի 2-րդ կետի համաձայն` պայմանագրային գումարի ամսական համամասնության սպառման դեպքում բժշկական կազմակերպությունը բժշկական օգնություն և սպասարկումն իրականացնում է հերթագրման եղանակով` բացառությամբ հետևյալ ծառայությունների`

1) անհետաձգելի բժշկական օգնություն,

2)Հայաստանի Հանրապետության կառավարության կողմից հաստատված՝ շրջապատի համար վտանգ ներկայացնող հիվանդությունների բժշկական օգնություն,

3) հոգեկան և նարկոլոգիական հիվանդների բժշկական օգնություն,

4) նախազորակոչային և զորակոչային տարիքի անձանց բժշկական օգնություն և սպասարկում, այդ թվում՝ փորձաքննություն,

5) ծննդօգնություն,

6) արտահիվանդանոցային բժշկական օգնություն (բացառությամբ` մասնագիտացված ստոմատոլոգիական բժշկական օգնության և դժվարամատչելի ախտորոշիչ հետազոտությունների):

Հավելված 4-ով հաստատված կարգի 6-րդ կետի համաձայն` հերթագրումը կատարվում է ըստ դիմելիության ժամկետների, ուղեգրի հիման վրա, որը որպես հերթագրումը հավաստող փաստաթուղթ պահվում է բժշկական կազմակերպությունում։ Կատարվում է գրառում անվճար և արտոնյալ պայմաններով բժշկական օգնության իրավունք ունեցող հիվանդների հերթագրման մատյանում և հիվանդներին տրվում է հերթագրման թերթիկ` բժշկական կազմակերպության կնիքով (վերջինիս առկայության դեպքում):

Հերթագրման կարգի 10-րդ կետը սահմանում է, որ պետության կողմից երաշխավորված անվճար և արտոնյալ պայմաններով բժշկական օգնության և սպասարկման իրավունք ունեցող` հերթագրված կամ հերթագրման ենթակա հիվանդներին հերթագրման կարգից դուրս` արտահերթ բժշկական օգնությունն իրականացվում է վճարովի հիմունքներով, տվյալ բժշկական կազմակերպությունում սահմանված կարգով և գներով, տեղեկացված հիվանդի կամ նրա հարազատի գրավոր համաձայնությամբ:

ՀՀ կառավարության 2004 թվականի մարտի 4-ի N 318-Ն որոշման Հավելված 4-ով հաստատված հերթագրման կարգի 11-րդ կետի համաձայն` պետության կողմից երաշխավորված բժշկական օգնություն և սպասարկում իրականացնող կազմակերպությունները ՀՀ առողջապահության նախարարություն են ներկայացնում հաշվետվություն բժշկական կազմակերպությունում իրականացվող հերթագրումների մասին: Հաշվետվության ձևը, այն ներկայացնելու պարբերականությունը սահմանվել է Հայաստանի Հանրապետության առողջապահության նախարարի 2014 թվականի դեկտեմբերի 23-ի N3072-Ա հրամանով:

Հայաստանի Հանրապետության առողջապահության նախարարության և բժշկական կազմակերպությունների միջև կնքվող պետության կողմից երաշխավորված անվճար և արտոնյալ պայմաններով բժշկական օգնության և սպասարկման ծառայությունների մատուցման մասին պայմանագրի 2.4 կետով նույնպես սահմանվում է, որ կատարողի կողմից պայմանագրային ծավալների ամսական համամասնությունների գերազանցման դեպքում պետության կողմից երաշխավորված անվճար և արտոնյալ պայմաններով բժշկական օգնությունն ու սպասարկումը կազմակերպվում է հերթագրման եղանակով` ՀՀ կառավարության նույն` 2004թ.-ի մարտի 4-ի N 318-Ն որոշմամբ հաստատված «Բժշկական կազմակերպություններում պետության կողմից երաշխավորված անվճար բժշկական օգնության և սպասարկման նպատակով բնակչության հերթագրման» կարգի։ Իսկ այն ծառայությունները, որոնց համար նշված կարգի համաձայն հերթագրում չի կարող կատարվել՝ ամսական համամասնությունները գերազանցող ծավալները ներառվում են հաջորդ ամիսների հաշվետվություններում՝ տվյալ ժամանակահատվածի համամասնությունների և տարեկան պայմանագրային գումարի շրջանակներում:

2015 թվականի պետական բյուջեի «Առողջապահություն» բաժնի ծրագրերով 2014 թվականի դեկտեմբերի 16-ից մինչև 2015 թվականի հոկտեմբերի 1-ն ընկած ժամանակահատվածում պետական պատվեր կատարող բժշկական կազմակերպությունների կողմից կատարված աշխատանքների ծավալների վերլուծության, ինչպես նաև բյուջեի կատարման ընթացքի և մինչև ընթացիկ տարեվերջ կանխատեսվող բուժօգնության ծավալների համադրման արդյունքում կանխատեսվել են 2015 թվականի պայմանագրային գումարների շուրջ 3,5 մլրդ դրամի գերակատարումներ։ ՀՀ կառավարության N 318-Ն որոշմամբ նախատեսված կարգով` Հայաստանի Հանրապետության վարչապետի հետ համաձայնեցմամբ, առանձին ծրագրերով և առանձին կազմակերպություններում կանխատեսվող թերակատարումների հաշվին կատարված վերաբաշխումների արդյունքում բժշկական կազմակերպությունների պայմանագրային գումարներում կատարվել են 2,5 մլրդ դրամի ավելացումներ` վերոնշյալ գերակատարումները մասնակի փոխհատուցելու նպատակով:

ՀՀ առողջապահության նախարարություն

Այս խորագրի վերջին նյութերը