Մասսայական կրճատումներ Գյումրիո՞ւմ

Գյումրու ավագանին նախորդ օրը հաստատել է 2010 թ. համայնքային բյուջեն, որը կազմում է 3 մլրդ 373 մլն դրամ: 2009-ի համեմատ այս տարվա բյուջեի գումարները պակասել են 363 մլն-ով, իսկ պատճառն, ըստ քաղաքապետի, այն է, որ նախորդ տարվա բյուջեի եկամուտները ծրագրի համեմատ կատարվել են 77 տոկոսով, կամ բյուջե պակաս է մուտքագրվել 497.5 մլն դրամի եկամուտ։

Համայնքային բյուջեի հաստատման օրերին քաղաքապետարանի ենթակայության տակ գտնվող մանկապարտեզներից, երաժշտական և սպորտային դպրոցներից ահազանգեր են ստացվում, որ իրենց հիմնարկություններում մասսայական կրճատումներ են տեղի ունենում քաղաքապետարանի ֆինանսական խնդիրների պատճառով:

Սակայն Գյումրու քաղաքապետը կտրականապես հերքում է մասսայական կրճատումների մասին լուրերը՝ նշելով, որ ընդհակառակը՝ իրենք նոր սպորտային դպրոցներ են բացում՝ նոր աշխատակազմ ներգրավվելով:

«Մենք կրճատումներ չունենք, բայց ունենք ամեն տարի նախնական բյուջեի հաստատումը. ում տարիքը լրացել է, նա օրենքով ազատվում է աշխատանքից, և նմանատիպ կրճատումներ մեզ մոտ եղել են: Իսկ մասսայական կրճատումներ մեզ մոտ չեն եղել: Հետո իրենք բոլորն էլ կողքից հավաքագրում են արտաբյուջետային գումարներ: Ուրեմն արտաբյուջեով իրենք իրավունք ունեն և՛ աշխատավարձն ավելացնել, և՛ լրացուցիչ հաստիքներ պահել: Այսինքն, իրենք ունեն հավելյալ գումարներ, որոնցով կարող են հոգալ իրենց կարիքների մի մասը»,- լրագրողներին տեղեկացրել  է Գյումրու քաղաքապետ Վարդան Ղուկասյանը:

Սակայն մյուս կողմից քաղաքապետարանի ենթակայության տակ գտնվող վերոհիշյալ հաստատություններում նշում են, որ իրականում արտաբյուջետային հավաքագրումներն այնքան սուղ են, որ մի կերպ բավարարում են կոմունալ ծառայությունենրի վճարումներին:

«Մեզ մոտ հաճախող աշակերտներն ամսեկան մուծում են ընդամենը 600  դրամ, որն ամբողջությամբ գնում է բոլոր կոմունալ ծախսերին: Իսկ աշխատավարձ ավելացնելուն կամ նոր աշխատատեղ ստեղծելուն այդ գումարները չեն բավարարում: Ճիշտ է, այլ աղբյուրներից էլ որոշակի ֆինանսավորում կա, սակայն բազմաթիվ կարիքներ ունենք. համապետական մրցումների ենք ուղարկում երեխաներին, վերանորոգման աշխատանքներ կատարում, ձմռանը ջեռուցման վճար մուծում և այլն»,-«7օր»-ի հետ զրույցում նշել է դպրոցներից մեկի աշխատակիցը, որը հասկանալի պատճառներով չցանկացավ ներկայանալ:

Դերենիկ Մալխասյան

Գյումրի

Related posts:

1. Կրճատումներ պետական համակարգում Այսօրվա կառավարության նիստում ՀՀ վարչապետ Տիգրան Սարգսյանը հայտարարել է, որ...
2. “Ճտերը” տարեվերջի՞ն են հաշվում Այս տարվա 10 ամիսների ընթացքում ՀՀ պետական բյուջեի եկամուտները կազմել...
3. ՀՀ ԱԽՔ Արթուր Բաղդասարյանը Գյումրու պատվավոր քաղաքացի՞ Նոյեմբերի 7-ին տեղի է ունենալու Գյումրու քաղաքի օրը, որը զուգորդվելու...
4. Ննջեցյալնները ևս շնորհակալ են Սերժ Սարգսյանից «7օր Բլոգ»–ը ներկայացնում է Դերենիկ Մալխասյանի մեկնաբանությունը՝ Այսօր Գյումրիի Մուշ-2...
5. Ռուսական բազաները Գյումրիից դուրս բերելու նախանշաննե՞ր «7օր»-ի տեղեկություններով՝ մայիսի 31-ին  ՌԴ պաշտպանության նախարար Անատոլի Սերդյուկովի հրամանով...

Related posts brought to you by Yet Another Related Posts Plugin.