Թուրքագետ. «Թուրքիայի նեոօսմանիզմի այս գաղափարախոսությունը հնարավորություն չունի, որ դառնա իրականություն»

ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանն այնպիսի տպավորություն ունի, որ հայերը գերագնահատում են Թուրքիայի արտաքին քաղաքականության լրջությունը։

-Թուրքիայի արտաքին քաղաքականությունը, մանավանդ վերջին շրջանում, իր մեջ սկսում է ներառել արկածախնդրության որոշակի տարրեր,- «Հենարան» մամուլի ակումբում ասել է Ռ. Սաֆրաստյանը,- իրականում մենք տեսնում ենք, որ Թուրքիայի հարևանները և աշխարհի հզոր պետություններն այս նոր խաղի կանոնները, որ փորձում է հաստատել Թուրքիան, չեն ընդունում, և նեոօսմանիզմի այս գաղափարախոսությունը, որը շատ վախվխելով, շատ զգուշորեն Թուրքիայի արտաքին քաղաքականության ղեկավարները նոր արտաքին քաղաքականության հիմքում են փորձում, ըստ էության, հնարավորություն չունի, որ դառնա իրականություն և հասնի իր նպատակներին։

Որպես Թուրքիայի արտաքին քաղականությունում այդ արկածախնդրության տարրերի ուժեղացում է թուրքագետը գնահատում Թուրքիայի արտգործնախարարի վերջին հայտարարությունները, որոնք, Ռ. Սաֆրաստյանի կարծիքով, ոչ մի լավ բանի չեն բերի առաջին հերթին Թուրքիային և վերջինիս հարևաններին։

-Թուրքիան այսպիսի մի փուլ է ապրում, երբ ռուսերեն մի արտահայտություն կա՝ и хочется и колется։

Ռ. Սաֆրաստյանի հետ համաձայնել է նաև նույն ակումբում հյուրընկալված «Նորավանք» գիտահետազոտական կենտրոնի ղեկավար Գագիկ Հարությունյանը։

-Եթե ժամանակին՝ Առաջին համաշխարհային պատերազմում, օսմանիզմը հանգեցրեց Օսմանյան կայսրության փլուզմանը, ապա կարծում եմ, որ Թուրքիայի մոտ հաջողությունների գլխապտույտը նեոօսմանիզմի համատեքստում նրան կարող է բերել նույն «կրախին»։

Ինչ վերաբերում է հայ-թուրքական հարաբերությունների կարգավորման ներկա գործընթացին, ապա Գ. Հարությունյանը համոզված չէ, որ այն մտել է փակուղի.

-Կան բարդություններ, և դրանք ի սկզբանե սպասելի էին։ Չեմ կարող բացառել, որ գործընթացն ավելին տևի, քան նախատեսվում էր։ Միևնույն ժամանակ այսօր թվում է, թե պետք է այդ գործընթացն ինչ-որ տրամաբանական ավարտ ունենա՝ հարաբերությունների ստեղծման տեսքով։

7or.am