Շինարարական ընկերության սեփականատեր Ասլան Դիլբարյանն այսօր լրագրողների հետ հանդիպմանը հայտնել է, որ իրեն ապօրինի կերպով ունեզրկել են:

Գործարարը պատմել է, որ ձեռնարկատիրական գործունեությունն ընդլայնելու նպատակով 2008թ. «Արդշինինվեստբանկ» ՓԲԸ–ից վերցրել է 50.000.000 ՀՀ դրամ վարկ և գրավադրել իր խանութը:

Մոտ մեկ տարի պարտաճանաչ կատարելով վարկային պարտավորությունները՝ մուծել է շուրջ 15.000.000 դրամ: Սակայն 2008թ. դեկտեմբերին տարել է սուր ինֆարկտ և ենթարկվել վիրահատության։

–Հիվանդությանս, ինչպես նաև համաշխարհային ֆինանսատնտեսական ճգնաժամի պատճառով չկարողացա ժամանակին ամբողջությամբ մարել վարկս,- ասել է Դիլբարյանը՝ նշելով, որ 2–րդ կարգի հաշմանդամ է։

Արդյունքում՝ բանկի դիմումի համաձայն` դատարանը 2009–ին նրան սնանկ է ճանաչել, որից հետո կազմակերպվել է կեղծ աճուրդ՝ առանց իրեն և բանկին տեղյակ պահելու:

Դիլբարյանին պատկանող գույքը վաճառվել է շուկայականից ցածր գնով՝ 145.000.000 ՀՀ դրամ գնահատվածը՝ 38.000.000–ով, իսկ պարտքը տույժ ու տուգանքներով հասել է 150 միլիոն դրամի:

Դիլբարյանի խոսքով՝ դատախազությունից հայտնել են, որ օրենքի լծակները սպառված են, քանի որ իրենք արդեն իսկ բողոքարկել են, և այլևս առաջ գնալու տեղ չկա:

7or.am