Մեկնաբանություն

12.05.2017 00:05


Կամ էշը, կամ էշատերը

Կամ էշը, կամ էշատերը

«Եթե Մովսեսը 40 տարի իր ժողովրդին տանում էր անապատով, որպեսզի ավետյաց երկիր հասնի, իսկ Մոսկվան էլ միանգամից չի կառուցվել, ակնհայտ է, որ 25-ամյա պետականություն ունեցող Հայաստանը՝ անգամ իր ամբողջ քաղաքական, ինտելեկտուալ ներուժով, դեռ ունի ժամանակ, որպեսզի հասնի իր երազած զարգացման աստիճանին՝ բոլոր ոլորտներում»: Սա Արմեն Աշոտյանի «հզոր» մտքերից վերջինն է կամ հերթականը:

Վերջին տասը տարում մենք անցանք «Առա՛ք Հայաստան»-ով, «Հավատանք, որ փոխենք»-ի մտայնությամբ շարունակեցինք մեր «հաղթական երթը», այնուհետ՝ ընթացանք «Ապահով Հայաստանի» միջով ու հասանք «Անվտանգություն և առաջընթաց»-ին: Անկախության քառորդ դարում Հանրապետական իշխանության հատկապես վերջին տասնամյակը պարզվեց՝ կորած տասնամյակ էր, երբ, ի դեմս Սերժ Սարգսյանի, մեզ առաջնորդում էր «Մովսեսը»: Ավելի ճիշտ՝ ոչ մի տեղ չէր տանում: Իսկ հիմա, ըստ Աշոտյանի, դեռ էլի ժամանակ ունենք:

Ինչ-խոսք, Սերժ Սարգսյանը և նրա թիմը վաղուց են հասել իրենց երազած զարգացման աստիճանին: Հասել ու անցել են ոչ թե 40, այլ 140 տարի առաջ: Իսկ ժողովուրդը մնացել է ՀՀԿ-ի հռչակած «Ապահով Հայաստանում»:

Բնականաբար, Սերժ Սարգսյանի և նրա թիմի «ինտելեկտուալ ներուժը» բավարար է, որպեսզի ժողովուրդը էլի մի 15 տարի սպասի, այն է՝ տառապի ու տանջվի մինչև...կամ՝ «էշը կսատկի կամ էշատերը»:

Իսկ մինչ այդ ժողովուրդը դեռ շարունակելու է «ճաշակել» թալանի, կոռուպցիայի, օֆշորի, մենաշնորհի և արատավոր այլ երևույթների հաստատուն գոյությունն ու դրա հետևանքները: Շարունակելու է «վայելել» քաղաքական մենաշնորհի առկայությունը և իշխանության վերարտադրման շարունակական պարտադրանքը, մինչև կհասնի իր երազած զարգացման աստիճանին: Բնականաբար, ոչ հայրենիքում, այլ հայրենիքից դուրս: Ուղղակի, տեղական «Մովսեսի» անապատից դուրս պրծնելու ուղիներ կգտնի և կգնա միանալու արդեն հեռացած այն 350 հազարին:

Այնպես, որ Աշոտյանը լավ կանի իր խրատաբանությունը պահի իրեն: Լսող չկա:

Կիմա Եղիազարյան

Այս խորագրի վերջին նյութերը