Ինչպես տեղեկացնում է «АПА» գործակալությունը, հղում անելով թուրքական ԶԼՄ-ներին, այսօր Թուրքիայի արտգործնախարարության պաշտոնական ներկայացուցիչ Ֆերիդուն Սինիրլիօղլուն ժամանելու է Շվեյցարիա։ Բեռնում նա հանդիպելու է իր շվեյցարացի գործընկեր Միխայել Ամբուլին։

Հանդիպման ընթացքում Ֆ. Սինիրլիօղլուն ճշգրտելու է ՀՀ սահմանադրական դատարանի դրույթները, որոնք Թուրքիայի կարծիքով չեն համապատասխանում արձանագրությունների ոգուն։ Նա պատրաստվում է Ամբուլի ուշադրությունը հրավիրել այն հանգամանքի վրա, որ եթե Հայաստանը քայլեր չձեռնարկի, որոնք կապացուցեն արձանագրությունների նախնական գաղափարին նրա հավատարմությունը, ապա Թուրքիան այլևս չի կարողանա շարունակել այս գործընթացը։

Մ. Ամբուլը Հայաստանի և Թուրքիայի միջև 2008թ. ամռանն սկսված գաղտնի բանակցային գործընթացի ճարտարապետներից է։ 

Ինչպես տեղեկացրել է Թուրքիայի ԱԳՆ-ն, Անկարան մտադիր է դիվանագիտական գրոհն սկսել անձնական հանդիպումների միջոցով, որից հետո միայն իրավաբանական գրավոր փաստաթուղթը կներկայացվի շահագրգիռ կողմերին։

Շվեյցարիայից հետո հանդիպումներ են նախատեսվում նաև ՄԽ անդամ երկրներ Ռուսաստանի, Ֆրանսիայի և ԱՄՆ-ի հետ։