Աշխարհ

22.03.2019 19:45


Թուրք ընդդիմադիր կուսակցապետը քննադատել է իշխանություններին տանկի գործարանը Քաթարին վաճառելու համար

Թուրք ընդդիմադիր կուսակցապետը քննադատել է իշխանություններին տանկի գործարանը Քաթարին վաճառելու համար

Թուրքիայի գլխավոր ընդդիմադիր ուժ համարվող «Ժողովրդահանրապետական կուսակցության» առաջնորդ Քեմալ Քըլըչդարօղլուն մարտի 31-ին կայանալիք ՏԻՄ ընտրությունների նախընտրական քարոզարշավում քննադատել է իշխանություններին տանկի գործարանը Քաթարին վաճառելու համար:

Քըլըչդարօղլուն Օրդուի շրջանում համայնքապետերի հետ հանդիպման ժամանակ՝ անդրադառնալով տնտեսական մի շարք խնդիրների, խոսքը ուղղել է ազգայնականներին:

«Դուք մեզ ահաբեկիչ եք անվանում: Հենց պահը գալիս է, որ պետք է պահպանեք երկրի զինագործարանները, դա մե՞զ եք թողնում: Ինչո՞ւ մյուսները չեն պահպանում: Ե՞ս եմ հայրենասերը, թե՞ դու: Ե՞ս եմ ազգայնական, թե՞ դու: Ասում են` «Մենք չենք վաճառում»: Խնդրեմ, տեսեք»,- ասել է Քըլըչդարօղլուն:

Ընդդիմադիր կուսակցապետը, այնուհետև խոսելով Քաթարին վաճառված գործարանի մասին, խոսքն ուղղել է Թուրքիայի նախագահ Էրդողանին.

«Իմ գործարանում տանկ են արտադրելու, ինձ վրա են վաճառելու: Հարցնում եմ՝ ինչու՞ տվեցիր Քաթարի բանակին: Ասում են, թե պետության հնարավորություններով այս գործարանը արդիականացնելու անհրաժեշտ է 50մլն դոլար: 9-10 հատ ինքնաթիռ ունես, ամենափոքր ինքնաթիռդ վաճառիր, 150 մլն դոլար է»:

Քըլըչդարօղլուն իշխանությունների այդ քայլը որակել է Թուրքիայի Հանրապետության նկատմամբ դավաճանություն:

Կուսակցապետն Էրդողանից պահանջել է չեղյալ համարել Քաթարի հետ կնքած պայմանագիրը և շեշտել, որ եթե ինքը գործարանի արդիականացման համար չկարողանա ճարել 50 մլն դոլար, ապա կդադարի զբաղվել քաղաքականությամբ:

«Բա որ վաղը չէ մյուս օրը Քաթարի հետ մեր հարաբերությունները սրվեն, ի՞նչ պետք է լինի: Այդ ե՞րբ հանկարծ սեր առաջացավ Քաթարի հանդեպ»- հարցադրում է արել Քըլըչդարօղլուն:

Այս խորագրի վերջին նյութերը