Երգչուհի Լուսինե Հարությունովան, որը հայ հանդիսատեսին հայտնի է «Հայաստանի ձայնը» երաժշտական նախագծի 4–րդ եթերաշրջանից, մասնակցել է ռուսական «Ну-ка, все вместе!» հայտնի երաժշտական նախագծին և հիացրել ժյուրիին։

Լուսինեն «Ну-ка, все вместе!» նախագծի շրջանակում կատարել է ճանաչված երգիչ Rag'n'Bone Man–ի «Human» երգը և հնարավոր 100 միավորից արժանացել 99–ի։

Նրա ելույթի մասին առաջինը խոսել է հայտնի երգչուհի, «ՎԻԱ Գրա» խմբի նախկին կատարող Նադեժդա Գրանովսկայան։

«Լուսինե, ձեր կատարումը, ձայնի տեմբրն իսկապես ֆանտաստիկ է։ Ես ամբողջ մարմնով փշաքաղվեցի։ Անչափ շնորհակալ եմ ձեզ այս բուռն զգացողությունների համար»,–ասել է նա։

«Ձեր կատարման մեջ կային նոտաներ, որոնք լսելուց հետո կարծես հոսանքահարվում էի։ Ես ուղղակի հաճույք ստացա, դուք հիանալի ձայն ունեք, որն այնքան խորն է, պարզապես հանցագործություն կլիներ անտարբեր անցնել և չսեղմել կոճակը»։

«Ну-ка, все вместе!» շոուն բրիտանական All together now նախագծի ռուսական տարբերակն է։ Այս շոուն շատ հայտնի է Ավստրալիայում, Բրազիլիայում, Կոլումբիայում, Դանիայում, Ֆինլանդիայում, Ֆրանսիայում, Գերմանիայում, Իտալիայում, Նիդեռլանդներում, Նորվեգիայում և այլ երկրներում։

«Ну-ка, все вместе!» նախագծի առաջին եթերաշրջանը եղել է 2019 թվականի մարտի 23-ին: Նախագծում հաղթող է ճանաչվել 22-ամյա Անդրեյ Լիսովսկին Սոչիից։ Նա ոչ միայն նվաճել է հաղթական գավաթը, այլև 1 միլիոն ռուբլի դրամական մրցանակ է ստացել։

Նախագիծը վարում է Նիկոլայ Բասկովը, իսկ ժյուրիի կազմը բաղկացած է 100 մասնագետից։ Ժյուրիի ղեկավարը Սերգեյ Լազերևն է: Նշենք, որ նախագծի երկրորդ եթերաշրջանի քասթինգին մասնակցել են 10,000 երգիչներ Ռուսաստանից, Ուկրաինայից, մերձբալթյան և ԱՊՀ երկրներից:

Նախագծի մրցույթային փուլ կանցնեն 70 կատարողներ, որոնցից էլ կընտրվի հաղթողը։

Աղբյուրը՝ armeniasputnik.am