Թրամփը նախորդ շաբաթ օրը ելույթ է ունեցել ռազմական ակադեմիայի շրջանավարտների առաջ: Նրա ելույթի տեսահոլովակում կարելի է տեսնել, թե ինչպես է Թրամփը փորձում մի ձեռքով ջրից կում անել, ապա, կարծես չկարողանալով բռնել բաժակը, ձախ ձեռքը նույնպես վեր է բարձրացնում՝ բաժակը պահելու։

Ավելի ուշ սոցցանցերի օգտատերերի շրջանում քննարկումների տեղիք է տվել Թրամփի՝ ելույթից հետո բեմից հեռանալու տեսանյութը։ Տեսանյութում Թրամփը բեմից իջնում է զգուշությամբ, մեկ այլ զինվորականի ուղեկցությամբ։

Կիրակի Թրամփը Twitter-ում գրառում էր արել՝ անդրադառնալով լուրջ առողջական խնդիրներ ունենալու մասին խոսակցություններին։

Նա պնդել է, որ բեմը թեք և սայթաքուն է եղել, ուստի զգուշորեն է իջել։

«Հարթակը, որով իջա Վեստ Փոյնթում իմ ելույթից հետո, չափազանց երկար էր, թեք, բազրիքներ չուներ և, որ ամենակարևորն է, չափազանց սայթաքուն էր։ Չէի պատրաստվում ընկնել ու թույլ տալ կեղծ լրատվամիջոցներին զվարճանալ»,-Twitter-ում գրել է Թրամփը։

Սակայն, ինչպես նշել են The Washington Post-ը և The New York Times-ը, եղանակն արևոտ է եղել, ուստի հարթակը դժվար թե սայթաքուն լիներ:

Նշենք, որ Սպիտակ տան ղեկավարը երեկ՝ հունիսի 14-ին, նշել է ծննդյան 74-րդ տարեդարձը:

Տեսանյութը կարող եք դիտել այստեղ։