Բելառուսի կենտրոնական ընտրական հանձնաժողովի կողմից նախագահի ընդդիմադիր թեկնածուներին չգրանցելուց հետո, երկրի մի քանի քաղաքներում բողոքի ակցիաներ են սկսվել, տասնյակ մարդիկ են բերման ենթարկվել: Այս մասին հայտնում է ria.ru-ն՝ վկայակոչելով «Весна» իրավապաշտպան կենտրոնին։

Բողոքի ակցիաները սկսվել են նախագահի թեկնածուների ցուցակում Վիկտոր Բաբարիկոյին և Վալերի Ցեպկալոյին չգրանցելու ԿԸՀ-ի որոշումից հետո: Ակտիվիստներին բերման են ենթարկել Մինսկում, Գոմելում, Բրեստում, Սոլիգորսկում և այլ քաղաքներում: Նրանց թվում կան նաև լրատվամիջոցների աշխատակիցներ։

Իրավապաշտպան կազմակերպության տվյալներով՝ Բելառուսի անվտանգության ուժերը բերման են ենթարկել բողոքի ակցիաների ավելի քան 230 մասնակցի, միայն Մինսկում՝ 188 մարդու։

Մինչդեռ РБК-ն հայտնում է, որ բերման են ենթարկվել «Ազատություն» ռադիոկայանի տեղական խմբագրության լրագրողները, «Եվրոռադիո»-ի նկարահանող խումբը, ինչպես նաև BBC-ի լրագրող Էնդի Սմայթը։

Բելառուսի նախագահի ընտրությունները նշանակված են օգոստոսի 9-ին: Կենտրոնական ընտրական հանձնաժողովը հուլիսի 14-ի նիստում գրանցել է հինգ թեկնածու, Բելգազպրոմբանկի նախկին ղեկավար Բաբարիկոյին և Բարձր տեխնոլոգիաների պարկի վարչակազմի նախկին ղեկավար Վալերի Ցեպկալոյին մերժել են գրանցել, նրանք համարվում էին Բելառուսի գործող նախագահ, վերընտրվել ցանկացող Ալեքսանդր Լուկաշենկոյի հիմնական մրցակիցները:

Աղբյուրը՝ tert.am