Ամուսիններն այժմ հիվանդանոցում են և բուժվում են ապակուց ու բեկորներից ստացված վնասվածքներից, պայթյունի ալիքից ամբողջովին ավերվել է նաև նրանց բնակարանը:

Լինան 3-ժամյա վիրահատության է ենթարկվել: Կնոջ խոսքով` ինքը ստիպված է եղել 11 հարկ աստիճաններով իջնել ցած՝ օգնության համար: Նրա ամուսինը, որը շատ ավելի լուրջ վնասվածքներ է ստացել, 6-ժամյա վիրահատության է ենթարկվել:

Լինան պատմել է, որ ինքն ու ամուսինը հետևել են առաջին պայթյունին, որն այդքան էլ ուժեղ չի եղել: Առաջին պայթյունից 33 վայրկյան անց տեղի է ունեցել երկրորդ՝ արդեն հզոր պայթյունը:

«Հիշում եմ, որ ամեն ինչ թռչում էր օդի մեջ»,-հեռախոսով իր հիվանդասենյակից պատմել է Լինան:

Պայթյունի հետևանքով ամուսինները կորցրել են գիտակցությունը, Լինան հետ է շպրտվել ապակե դռան միջով, նա կոտրել է արմունկը, մեջքի և մարմնի այլ հատվածների բազմաթիվ վնասվածքներ է ստացել:

Իմադը շատ ավելի լուրջ վնասվածքներ է ստացել, նրա մարմնի մեծ մասը վիրակապված է: Նա տեղեկացրել է, որ ավելի հեշտ է տեսանյութով նկարահանել իր վնասվածքները, քան հերթով թվել դրանք: Նա ոտքից գլուխ վնասվածքներ ունի, նաև աջ կողի կոտրվածք:

Պայթյունից հետո առաջինն ուշքի է եկել Լինան և առաջինը, ինչ մտածել է, եղել է այն, թե արդյոք իր ամուսինը ողջ է: Երբ նա կարողացել է վերջապես ուշքի բերել ամուսնուն, Խալիդն ասել է, որ ինքը մահանում է:

Լինան փորձել է ամուսնուն քարշ տալով բերել դռների մոտ, սակայն ուժերը չեն բավարարել: Այդ ժամանակ նա սկսել է 11 հարկ իջնել աստիճաններով, դրսում հանդիպել է ծանոթ ոստիկանի: Ոստիկանն ու այլ մարդիկ բարձրացել են բնակարան և, պոկված դուռը որպես պատգարակ օգտագործելով և դրա վրա տեղավորելով Իմադին, նրան դուրս են հանել և երկուսին էլ տեղափոխել հիվանդանոց:

Պայթյունից ընդամենը 585 մետր հեռավորության վրա գտնվող նրանց բնակարանը, որը ձեռք էր բերվել ընդամենը 2 տարի առաջ, հիմնահատակ քանդվել է:

Հիշեցնենք, որ Լիբանանի մայրաքաղաք Բեյրութում փորձում են ուշքի գալ օգոստոսի 4-ի երեկոյան որոտացած աղետալի պայթյունից:

Լիբանանյան լրատվամիջոցների նոր տեղեկությունների համաձայն՝ պայթյունի հետևանքով զոհերի թիվը հասել է 149-ի, վիրավորները 5 000-ից ավելի են։ Զոհերից 11-ը հայ են: Տասնյակ մարդիկ դեռևս անհետ կորած են համարվում: Ավելի վաղ հաղորդվում էր 100 զոհի և 4000 վիրավորի մասին:

Բեյրութն օգոստոսի 4-ի երեկոյան որոտացած հզոր պայթյունի հետևանքով աղետի գոտի է հայտարարվել, քաղաքում երկու շաբաթով՝ օգոստոսի 4-18-ը, արտակարգ դրություն է սահմանվել:

Լիբանանի Անվտանգության բարձրագույն խորհրդի արտահերթ նիստում վարչապետ Հասան Դիաբը հայտարարել էր, որ աղետի մեղավորները խիստ պատասխանատվության են ենթարկվելու:

«Բացարձակապես անընդունելի է, որ վեց տարի շարունակ նավահանգստի պահեստում 2750 տոննա ամոնիումի նիտրատ է պահվել, և նավահանգստի կառավարիչների կողմից պրոֆիլակտիկ որևէ գործողություն չի իրականացվել»,-շեշտել է Դիաբը:

Բեյրութում որոտացած ավերիչ պայթյունի հետևանքով մեծ վնասներ են կրել նաև հայկական համայնքային կառույցները:

«Վնասվել են Անթիլիասի Մայր Տաճարի, Վեհարանի, հայագիտական և մանկավարժական կենտրոնների, ինչպես նաև՝ «Կիլիկիա» թանգարանի դռները, պատուհանները, ջահերը»,-ասված է կաթողիկոսարանի տարածած հաղորդագրությունում:

Տեսանյութն` այստեղ:

Աղբյուրը՝ tert.am