Ապրիլի 16-ին ՀՀ ԱԳ նախարար Էդվարդ Նալբանդյանի նախագահությամբ Երևանում կայացավ ՀԱՊԿ-ի Արտաքին գործերի նախարարների խորհրդի նիստը:

Նիստի օրակարգում ներառված էին միջազգային անվտանգության արդի խնդիրները, կազմակերպության անդամ-երկրների միջև արտաքին քաղաքականության համադրմանը, ինչպես նաև միջազգային և տարածաշրջանային կազմակերպությունների   հետ   ՀԱՊԿ  փոխգործակցության հիմնական ուղղություններին առնչվող հարցեր:

Նախարարները քննարկեցին և հավանություն տվեցին ՀԱՊԿ-ի և ՄԱԿ-ի քարտուղարությունների միջև  համագործակցության մասին հուշագրի նախագծին:

Իր ելույթում Հայաստանի արտաքին քաղաքական գերատեսչության ղեկավարն ընդգծեց ՀԱՊԿ անդամ պետությունների միջև համագործակցության ներուժի առավել արդյունավետ օգտագործման կարևորությունը:

Նիստի մասնակիցներն արդյունավետ քննարկում ծավալեցին ՀԱՊԿ գործունեության տարբեր ոլորտներում բազմաբովանդակ փոխգործակցության շուրջ, անդրադարձան  Արագ արձագանքման հավաքական ուժերի ստեղծման գործընթացին:

Հանդիպման ժամանակ քննարկվեցին նաև ՀԱՊԿ անդամ երկրների կողմից Աֆղանստանում իրավիճակի կայունացմանն ուղղված ջանքերի գործադրման հետ կապված հարցեր:

ՀՀ ԱԳՆ մամուլի և տեղեկատվության վարչություն