Գյումրիում, «Ավտովարորդների իրավունքների պաշտպանությունը ՀՀ մարզերում» թեմայով քննարկման ընթացքում, ավտովարորդների իրավունքների պաշտպանության «Աքիլլես» կենտրոնի ղեկավար Էդուարդ Հովհաննիսյանը անդրադարձել է վարորդ-ճանապարհային ոստիկաններ հարաբերություններին և այդտեղ առկա խնդիրներին: Իսկ ներկայիս տուգանքների համակարգը, ըստ «Աքիլլես» կազմակերպության նախագահի, ավելի շատ նպաստում է կոռուպցիոն ռիսկերի բարձրացմանը:

«Մենք գիտենք, որ պլան է դրված։ Երբ ամեն առավոտ տեսուչները վաշտի հրամանատարներին գալիս–զեկուցում են, հարց է հնչում՝ ինչու՞ ես էսօր քիչ գրել: Կա էսպիսի մի իրավիճակ, որ ոնց որ թե պլան դրված լինի տուգանքների վրա: Դրա համար էլ մարզերի տեսուչներին ուղարկում են Երևան, որ էնտեղ իրենց ֆինանսական հարցերը լուծեն: Դա իրականացվում է այն պատճառով, որ տուգանքներից ձևավորվում է արտաբյուջետային ֆոնդ, և տեսուչը տուգանքների չափից հավելավճար է ստանում»,–ասել է Էդուարդ Հովհաննիսյանը:

Կազմակերպության կատարած ուսումնասիրությունների համաձայն՝ վերջին 3 տարում դատական 350 գործ է հարուցվել, իսկ  դատարանը մեծամասամբ վճիռ է կայացրել հօգուտ ճանապարհային ոստիկանների: «Աքիլլես» կազմակերպության իրավաբան Նորայր Հարությունյանի կարծիքով՝ պատճառը վարորդների անտեղյակությունն է օրենքներին, իսկ  սեփական իրավունքի պաշտպանության համակարգը մեր երկրում կայացած չէ:

Դերենիկ Մալխասյան

Գյումրի