Ռիո դե Ժանեյրոյի ոստիկանությունը անչափահասի բռնաբարության մեջ մեղադրվող բրազիլացու մոտ հայտնաբերել է նացիստական ​​իրերի հավաքածու և մոտ 3 միլիոն եվրո արժողությամբ զենք:

58-ամյա կասկածյալի տանը հայտնաբերվել է ավելի քան 1000 իր՝ ներառյալ նացիստական ​​համազգեստ, պարբերականներ, նկարներ, նացիստական ​​տարբերանշաններ, Ադոլֆ Հիտլերի պատկերներ, դրոշներ և Երրորդ ռեյխի մեդալներ: Հայտնաբերվել են նաև այդ ժամանակաշրջանի զենքեր և զինամթերք:

Այս ամենը բացահայտվել է, երբ ոստիկանները փորձել են ձերբակալել տղամարդուն՝ անչափահասի բռնաբարության և այլ երեխաներին բռնության ենթարկելու մեջ կասկածանքով: Նրան մեղադրանք է առաջադրվել նաև ապօրինի զենք պահելու և ռասայական խտրականության համար:

«Նա խելացի և պերճախոս է, սակայն ժխտում է Հոլոքոստը, հոմոֆոբ է և մանկապիղծ, սակայն ասում է, որ «որսում է» միասեռականներին»,-Reuters-ին ասել է գործով գլխավոր հետախույզ Լուի Արմոնդը: «Ես բժիշկ չեմ, սակայն նա ինձ խելագար է թվում»:

Նրա խոսքով՝ կասկածյալը ներդրողների հարուստ ընտանիքից է և հավանաբար հավաքածուն ստեղծելու համար օգտագործել է իր ժառանգությունը: Արմոնդի գնահատմամբ՝ նացիստական ​​բարձրաստիճան համազգեստի արժեքը մոտ 250.000 եվրո է:

Ոստիկանությունը հետաքննում է կասկածյալի կապերը նացիստական ​​և ծայրահեղ աջ խմբերի հետ և փորձում պարզել, թե արդյո՞ք նա ակտիվորեն զբաղվել է նման իրերի առևտրով:

Աղբյուրը՝ news.am