Հարցազրույց

25.07.2012 09:43


Զարուհի Հովհաննիսյան.

Զարուհի Հովհաննիսյան.

Հարցազրույց լրագրող, հրապարակախոս Զարուհի Հովհաննիսյանի հետ

-ՀԱԿ ակտիվիստներ Տիգրան Առաքելյանի, Արտակ Կարապետյանի, Սարգիս Գևորգյանի և Դավիթ Քիրամիջյանի  դեմ  դատարանի կայացրած վճիռը, ըստ Ձեզ, կարելի՞ է որակել  որպես քաղաքական պատվեր:

-Սա միանշանակ ՀՀԿ-ի  քաղաքական որոշումն է, քանի որ եթե մենք զուգահեռներ անցկացնենք  նախաքննության փուլում գտնվող «Հարսնաքարի» գործի հետ, այնտեղ տեսնում ենք, որ պահանջում են 4-6 տարի, և այստեղ էլ 6 տարվա դատավճիռ է կայացվում. դա միանշանակ քաղաքական պատվեր է:

-Իսկ ինչպե՞ս եք գնահատում այն հանգամանքը, որ նման նախաձեռնություններում շեշտադրումը միշտ նախագահի միջամտության վրա է դրվում  («Նախագա՛հ, պատժի՛ր նրանց» և այլն)։ Որքանո՞վ է դա ճիշտ:

-Նախ, նախագահը Սահմանադրությամբ  գերագույն հրամանատարն է: Երկրորդ, նա ՀՀԿ-ի նախագահն է, ու քանի որ այս դեպքում մենք տեսնում ենք, որ սա քաղաքական պատվեր է, և բոլոր որոշումները կայացվում են Բաղրամյան 26-ում, ինչպես դա եղավ Մաշտոցի պուրակի դեպքում, Ռուբեն Հայրապետյանի մանդատը վայր դնելու դեպքում և այլն, ուստի մենք  այժմ դիմում ենք անմիջականորեն իրեն, քանի որ ինքն իրեն պահում է միապետի, «թուրքմենբաշու» կեցվածքով, և այլ ելք չկա, քան դիմել նրան, որպեսզի նա թույլ տա իրավապահ մարմիններին գոնե ինքնուրույն գործելու:

-Իսկ չե՞ք կարծում, որ, դիմելով նրա միջամտությանը նման դեպքերում,  դուք ինքնըստինքյան նպաստում եք նրա «թուրքմենբաշիացմանը»: Ստացվում է արդարություն պահանջում եք նրանից, ով, Ձեր իսկ բնորոշմամբ, ստեղծված իրավիճակի իրական պատճառն է։

-Մենք ոչ թե աջակցում ենք նրան, այլ ցույց ենք տալիս, որ նա է միակ որոշումներ կայացնողը:

-Ինչի՞ մեջ եք տեսնում Հայաստանում համակարգային փոփոխությունների իրականացումը: Ըստ Ձեզ՝ առաջիկա նախագահական ընտրությունները կարո՞ղ են լուրջ փոփոխությունների առիթ դառնալ:

-Միայն քաղաքացիական հանրությունը կարող է տեր կանգնել այդ բոլոր պրոցեսներին, որպեսզի բարձրանա հասարակության իրավագիտակցությունը, և հանրությունը կարողանա ընտրություն կատարել, ձևավորել իր պահանջները և ներկայացնել դրանք:

-Ընտրությունների միջոցով հնարավո՞ր է դա, թե՞

-Ընտրությունների համար պետք է ունենալ իրավագիտակից քաղաքացի:

-Մենք ունե՞նք նման քաղաքացի:

-Մենք ձևավորում ենք այդպիսի քաղաքացիական հասարակություն:

Զրույցը վարեց Սարգիս Շիրխանյանը 

Այս խորագրի վերջին նյութերը