Լրահոս

04.07.2009 13:14


Հայաստան կժամանի Կիպրոսի Հանրապետության Նախագահ Դիմիտրիս Խրիստոֆիասը

ՀՀ Նախագահ Սերժ Սարգսյանի հրավերով հուլիսի 6-ին երկօրյա պետական այցով Հայաստան կժամանի Կիպրոսի Հանրապետության Նախագահ Դիմիտրիս Խրիստոֆիասը տիկնոջ՝ Էլսի Խրիստոֆիայի հետ:
Նույն օրը ՀՀ Նախագահի նստավայրում տեղի կունենա Կիպրոսի Նախագահի դիմավորման պաշտոնական արարողությունը, որին կհաջորդի Նախագահներ Սերժ Սարգսյանի և Դիմիտրիս Խրիստոֆիասի առանձնազրույցը: Այնուհետև կկայանա պաշտոնական պատվիրակությունների ընդլայնված կազմով հանդիպումը, ապա Հայաստանի և Կիպրոսի ղեկավարները հանդես կգան համատեղ մամուլի ասուլիսով:
Հուլիսի 6-ի երեկոյան Հայաստանի Հանրապետության Նախագահի և տիկին Ռիտա Սարգսյանի անունից ի պատիվ Կիպրոսի Նախագահի և տիկին Էլսի Խրիստոֆիայի կտրվի պետական ճաշ:
Այցի շրջանակում Դիմիտրիս Խրիստոֆիասը հանդիպում կունենա վարչապետ Տիգրան Սարգսյանի հետ, կհյուրընկալվի Ամենայն Հայոց Գարեգին Երկրորդ կաթողիկոսին:
Կիպրոսի Նախագահը կայցելի Մեծ եղեռնի հուշահամալիր, ծաղկեպսակ կդնի զոհերի հուշակոթողին, կլինի Հայոց ցեղասպանության թանգարանում, ծառ կտնկի Հիշատակի պուրակում:
Երևանի քաղաքապետարանում Դիմիտրիս Խրիստոֆիասը հանդիպում կունենա քաղաքապետ Գագիկ Բեգլարյանի և Երևան քաղաքի մի խումբ պատվավոր քաղաքացիների հետ, ինչպես նաև կշրջի Երևանի պատմության թանգարանում:
Կիպրոսի Նախագահը և տիկին Էլսի Խրիստոֆիան կայցելեն նաև Հայաստանի պատմամշակութային վայրեր, կլինեն Գառնիում Գեղարդում, Մատենադարանում:
Հուլիսի 7-ին Կիպրոսի ղեկավարը կմեկնի Հայաստանից:

Այս խորագրի վերջին նյութերը