Երևանի քաղաքապետի հանձնարարությամբ քաղաքապետի առաջին տեղակալ Տարոն Մարգարյանը աշխատանքային քննարկում էր հրավիրել մայրաքաղաքի  շուրջ 3 տասնյակ շուկաների տնօրենների մասնակցությամբ:

Տարոն Մարգարյանն ընդգծեց, որ բացօթյա ապօրինի առևտրի կանոնակարգման և դրանք սահմանված վայրեր տեղափոխելու գործընթացը շարունակվելու է:

«Խնդիր է դրված բացօթյա առևտրով զբաղվողներին ապահովել համապատասխան տեղերով, որտեղ նրանք կշարունակեն իրենց առևտրային գործունեությունը»:

Ներկայացվեց, որ մայրաքաղաքի մայթերն ու հանրային օգտագործման այլ վայրերը բացօթյա ապօրինի առևտրից ազատելուց հետո շուկաներն ավելի քան 3000 վաճառատեղ են առաջարկել:

Տարոն Մարգարյանը նաև ընդգծեց, որ վարչական շրջաններում գործող շուկաների զբաղվածության  ընդհանուր պատկերն ունենալուց հետո քաղաքապետարանը որոշակի քայլեր կձեռնարկի նաև նոր  փոքր շուկաների կառուցման ուղղությամբ, եթե դրա անհրաժեշտությունը լինի:

Շուկաների կազմակերպիչներն ու տնօրենները պատրաստակամություն հայտնեցին հնարավորության դեպքում նույնիսկ զեղչեր կիրառել:

Քաղաքապետի առաջին տեղակալը ներկաներին մեկ անգամ ևս հավաստիացրեց, որ այս հարցում հետքայլ չի լինելու, ուստի հորդորեց առավել հետևողական լինել աշխատատեղերն ըստ պահանջի ու քանակի ապահովելու հարցում:

Երևանի քաղաքապետարանի տեղեկատվության

և հասարակայնության հետ կապերի վարչություն