Ռուս ընդդիմադիր գործիչ Բորիս Նեմցովի սպանության համար մեղադրվող Զաուր Դադաևն ու Շահիդ, Անզոր Գուբաշևները Դիտորդների հանրային հանձնաժողովի անդամների հետ զրույցում հրաժարվել են իրենց խոստովանական ցուցմունքներից։

«mk.ru»–ն հայտնում է, որ մասնավորապես Դադաևը պատմել է՝ հարցաքննության ամբողջ ընթացքում իր վրա գոռացել են՝ դո՞ւ ես սպանել Նեմցովին:

«Պատասխանում էի՝ ո՛չ: Բերման ենթարկվելու ժամանակ ընկերոջս՝ Ռուսլան Յուսպովի հետ էի: Ասացին, որ եթե ընդունեմ մեղքս, նրան բաց կթողնեն: Ես էլ համաձայնեցի: Մտածեցի, որ ըկերոջս կփրկեմ, ինձ էլ Մոսկվա ողջ կհասցնեն: Իսկ եթե ինձ հե՞տ էլ նույնը լիներ, ինչ Շավանովի: Նա, իբր, պայթեցրել է ինքն իրեն»,- ասել է Դադաևը:

Նա նաև պնդել է, որ իր անմեղությունը կարող է ապացուցել Ալի Մատիևը, ում գտնվելու վայրն անհայտ է:

Գուբաշև եղբայրներն էլ նշել են, որ հարցաքննության ժամանակ ծեծել են Զաուր Դադաևին:

«Ինձնից էլ պահանջեցին, որ ես ասեմ՝ մենք ենք սպանել Նեմցովին: Հետո մեզ ինչ-որ տեղ տարան, ինքնաթիռում էինք։ Մեր գլխին պարկ էին հագցրել, հանեցին միայն Մոսկվայում»,–պատմել է Գուբաշևը:

Շահիդ Գուբաշևը ևս պնդել է, որ ինքն ու եղբայրն անմեղ են։

7or.am