Աշխարհ

13.03.2015 15:18


Լրագրողին աշխատանքից հեռացրել են Միշել Օբամային «Կապիկների մոլորակը» ֆիլմի հերոսի հետ համեմատելու համար

Լրագրողին աշխատանքից հեռացրել են Միշել Օբամային «Կապիկների մոլորակը» ֆիլմի հերոսի հետ համեմատելու համար

Իսպանալեզու ամերիկյան «Univision» ընկերությունն աշխատանքից ազատել է լրագրողին այն բանից հետո, երբ վերջինը ԱՄՆ առաջին տիկին Միշել Օբամային համեմատել է «Կապիկների մոլորակը» ֆիլմի հերոսներից մեկի հետ։ «vesti.ru»–ի փոխանցմամբ՝ հաղորդավար Ռոդներ Ֆիգերոան անհաջող կատակել է «El Gordo y La Flaca» հեռուստաշոուի եթերում։

«Դուք գիտեք, որ Միշել Օբաման նման է «Կապիկների մոլորակը» ֆիլմի հերոսին»,–ասել է Ֆիգերոան։

Մյուս հաղորդավարները չեն համաձայնել նրա հետ՝ պնդելով, որ Միշելը բավականին գրավիչ է։ Բայց Ֆիգերոան պնդել է իր խոսքերը. «Բայց դա իրականությո՛ւնն է»։

Ավելի ուշ հեռուստաընկերության պաշտոնական ներկայացուցիչ Ռոզմարի Մերսեդեսը հայտարարել է, որ այդ եթերից հետո լրագրողն անմիջապես հեռացվել է աշխատանքից։

«Առաջին տիկին Միշել Օբամայի հասցեին Ռոդներ Ֆիգերոայի մեկնաբանությունները կշտամբելի են և ոչ մի դեպքում չեն արտահայտում «Univision»–ի տեսակետներն ու արժեքները»,–ասել է նա։

Ռոդներ Ֆիգերոան այդ հեռուստաընկերությունում աշխատում էր 17 տարի և արժանացել էր «Emmy» մրցանակի։ Ի դեպ, նա արդեն նամակ է գրել Միշել Օբամային՝ ներողություն խնդրելով իր խոսքերի համար։ Լրագրողը պնդել է, որ ինքը ռասիստ չէ, իսկ հեռուստաընկերության տնօրինությունն իրեն անարդար է հեռացրել աշխատանքից։

7or.am

Այս խորագրի վերջին նյութերը