Նորվեգիայի իշխանությունները մտադիր են դասեր կազմակերպել ներգաղթյալների համար, որոնց ընթացքում վերջիններին եվրոպական վարվելաձևի նորմեր և ոճ կսովորեցնեն։ Այս մասին գրում է «lifenews»–ը՝ «France-Presse» գործակալությանը հղումով։

«Մեր նպատակն է օգնել փախստականներին խուսափել սխալներից՝ նորվեգական մշակույթին ծանոթանալով»,–ասել է Լինդա Հագենը, որը զբաղվում է Նորվեգիայում գաղթականների ընդունմամբ։

Նշվում է, որ այդ դասընթացների ժամանակ առանձնահատուկ ուշադրություն կդարձվի կանանց հետ վարվելու էթիկային և սեռական ոտնձգության անթույլատրելիությանը։

Դասընթացների կազմակերպիչները մտադիր են սեռական ոտնձգությունների օրինակներ բերել և պատմել, թե ինչ հետևանքներ են դրանք ունենում։

Նման որոշում է կայացվել գերմանական Քյոլնի, շվեյցարական Ցյուրիխի, ավստրիական Զալցբուրգի և ֆիննական Հելսինկիի դեպքերից հետո, որտեղ հարյուրից ավելի կանայք ենթարկվել են սեռական ոտնձգության ներգաղթյալների կողմից։

7or.am