Սահմանադրական փոփոխություններին դեմ արտահայտվող Ֆրանսիայի արդարադատության նախարար Քրիստիան Տոբիրան հրաժարական է ներկայացրել։ Այս մասին հայտնում է «BBC News»–ը։

Նրա փոխարեն նշանակվել է սոցիալիստ Ժան–Ժակ Յուրվոասը, ով սատարում է օրենսդրական հնարավոր փոփոխություններին։

Ելիսեյան պալատից հայտնել են, որ Ֆրանսիայի նախագահ Ֆրանսուա Օլանդն արդեն իսկ ստորագրել է Տոբիրայի հրաժարականը։

Փետրվարին Ֆրանսիայի խորհրդարանի ստորին պալատում պետք է սկսվեն սահմանադրական փոփոխությունների վերաբերյալ բանավեճերը։ Նախատեսվում է, մասնավորապես, երկքաղաքացիություն ունեցող անձանց զրկել ֆրանսիական անձնագրից, եթե նրանք դատապարտված են եղել ահաբեկչության համար, և երկարացնել արտակարգ դրության ռեժիմը կես տարով։ Գործող Սահմանադրությամբ՝ արտակարգ դրություն կարելի է հայտարարել առավելագույնը 3 ամսով։

Սահմանադրությունը փոխելու մտադրության մասին հայտարարվել էր նախորդ տարի Փարիզում տեղի ունեցած ահաբեկչություններից հետո։ Նոյեմբերի 14–ին իրականացված ահաբեկչությունների շարքին զոհ էր գնացել 130, ավելի քան 350–ը՝ վիրավորվել։

7or.am