ՀՀ Ազգային ժողովը դեկտեմբերի 16-ին շարունակել է արտահերթ նստաշրջանի աշխատանքը եւ քվեարկությամբ ընդունել նախորդ օրը քննարկված օրինագծերը եւ համաձայնագիրը:

ՀՀ ֆինանսների նախարար Վարդան Արամյանը երրորդ ընթերցմամբ քննարկման է ներկայացրել «Գնումների մասին» օրենքի նախագիծը: «ՀՀ քաղաքացիական օրենսգրքում փոփոխություն եւ լրացումներ կատարելու մասին» եւ կից ներկայացված օրենսդրական փաթեթը երկրորդ ընթերցմամբ քննարկման է ներկայացրել ՀՀ արդարադատության նախարար Արփինե Հովհաննիսյանը:

«Պետական գույքի մասնավորեցման 2006-2007 թվականների ծրագրի մասին» ՀՀ օրենքում փոփոխություն եւ լրացում կատարելու մասին» օրենքի նախագիծը երկրորդ ընթերցմամբ եւ ամբողջությամբ քննարկման է ներկայացրել ՀՀ ԿԱ պետական գույքի կառավարման վարչության պետ Արման Սահակյանը:

Երրորդ ընթերցմամբ եւ ամբողջությամբ ընդունվելու համար ՀՀ ԿԱ ՊԵԿ նախագահի տեղակալ Վախթանգ Միրումյանը քննարկման է ներկայացրել «Հարկային մարմնի կողմից վերահսկվող եկամուտների գծով արտոնություններ սահմանելու մասին» օրենքի նախագիծը՝ կից փաթեթով:

Պետական կենսաթոշակների մասին» օրենքում փոփոխություններ եւ լրացումներ կատարելու մասին» օրենքի նախագիծը երկրորդ ընթերցմամբ եւ ամբողջությամբ ընդունելու համար քննարկման է ներկայացրել ՀՀ աշխատանքի եւ սոցիալական հարցերի նախարար Արտեմ Ասատրյանը:

«Ավտոմոբիլային տրանսպորտի մասին» ՀՀ օրենքում փոփոխություններ եւ լրացումներ կատարելու մասին» օրենքի նախագիծը եւ կից փաթեթը քննարկվել է երկրորդ ընթերցմամբ:

ԱԺ պատգամավորներ Վահրամ Բաղդասարյանի, Հովհաննես Սահակյանի եւ Արմեն Ռուստամյանի հեղինակած «ՀՀ ԱԺ պատգամավորի գործունեության երաշխիքների մասին» օրենքի նախագիծը քննարկվել է երրորդ ընթերցմամբ:

«Պետական նպաստների մասին» ՀՀ օրենքում փոփոխություններ եւ լրացումներ կատարելու մասին» օրենքի նախագիծը նույնպես քննարկվել է երկրորդ ընթերցմամբ:

ԱԺ պատգամավորներ Վահրամ Բաղդասարյանի, Հովհաննես Սահակյանի եւ Արմեն Ռուստամյանի հեղինակած «Ազգային ժողովի կանոնակարգ» սահմանադրական օրինագիծը եւ կից օրենսդրական փաթեթը քննարկվել է երրորդ ընթերցմամբ եւ ամբողջությամբ:

Զեկուցողները տեղեկացրել են, որ ներկայացված նախագծերը ենթարկվել են մասնակի խմբագրական փոփոխությունների:

ՀՀ Ազգային ժողովն ավարտել է արտահերթ նստաշրջանի աշխատանքը: