Գեներալ Մանվել Գրիգորյանը դեռ կպատասխանի Հայաստանի երկրորդ նախագահ Ռոբերտ Քոչարյանի այն պնդումներին, թե 2008 թվականին պաշտպանության այն ժամանակվա փոխնախարարներ Մանվել Գրիգորյանը և Գագիկ Մելքոնյանը բանակը քաղաքականության մեջ ներքաշելու փորձեր են արել: Այս մասին «Ազատության» հետ զրույցում այսօր հայտարարեց կալանավորված գեներալի փաստաբան Արսեն Մկրտչյանը:

Վերջինիս խոսքով՝ իր պաշտպանյալն, իհարկե, չի ուրախացել Քոչարյանի կալանավորմամբ, բայց և նախկին նախագահի ձևակերպումները, Մանվել Գրիգորյանի համար, մեղմ ասած, գեղեցիկ չեն։ «Մանվել Գրիգորյանը, ի տարբերություն որոշ այլ հայտնի կալանավորվածների, ավելի քչախոս է, մեղադրանքներ չի շպրտում, զուսպ է, բայց, որպես պաշտպանական կողմի ներկայացուցիչ, ասեմ, որ նման հայտարարություններն անպատասխան չեն մնա: Դա գեղեցիկ չէ: Դրա գնահատականը մի փոքր ուշ, եթե ստիպված եղանք, կտանք»,-ասաց փաստաբանը:

Փաստաբան Արսեն Մկրտչյանը կոչ արեց երկրորդ նախագահի պաշտպանական թիմին՝ չչարախոսել Մանվել Գրիգորյանի մասին։ «Ինչ չի արել մեր պաշտպանյալը, բնավ պետք էլ չէ հրապարակայնացնել: Նա վատ բաներ չի արել, հիմա էլ չի անում, հիմա էլ չի արձագանքում, չի խանգարում մնացած կալանավորվածներին»,-ասաց Գրիգորյանի փաստաբանը:

Նրա խոսքով՝ գեներալի միակ լուրջ խնդիրն այս պահին կալանքի կրման հետ չհամատեղվող հիվանդություններն են․ ամեն օր սպասում են վատթարագույնին: Պաշտպանը Մանվել Գրիգորյանի այժմյան վիճակը համեմատում է հայտնի «Հաց բերողի» վիճակի հետ՝ պնդելով, որ իր պաշտպանյալն այժմ ավելի վատառողջ է։ Ինչ վերաբերում է Մանվել Գրիգորյանի ընտանիքի անդամներին, Արսեն Մկրտչանի խոսքով՝ թեև նրանց դեմ տարբեր մեղադրանքներ են առաջադրվել, բոլորն էլ Հայաստանում են և սատարում են գեներալին։