Մեծ Բրիտանիայի կառավարությունն սկսել է խորհրդարանական խմբակցությունների հետ քննարկել Եվրամիությանն անդամակցելու հարցով կրկնակի հանրաքվեի անցկացման հնարավորությունը, սակայն կաբինետի առաջարկած սխեման չի բավարարել ընդդիմությանը: Այդ մասին, «ՌԻԱ Նովոստի» փոխանցմամբ, հայտնել են քաղաքական խորհրդակցությունների մասնակիցները, որոնք անցկացվել են վարչապետ Թերեզա Մեյի նախաձեռնությամբ:

Ըստ կառավարության ներկայացուցիչներների՝ հանրաքվեի նախապատրաստումն ու անցկացումը կպահանջի 15 ամիս:

Ավելի վաղ հայտարարվել էր, որ ըստ օրենքի՝ հանրաքվեի նախապատրաստման համար կպահանջվի շուրջ 5 ամիս:

«Կառավարության կողմից սխալ և անօգտակար է այդ հարցի վերաբերյալ կանխահայտ սուտ տեղեկատվություն ներկայացնելը»,- լրագրողներին ասել է նախկին գլխավոր դատախազ, Պահպանողական կուսակցության անդամ Դոմինիկ Գրիվը։

Պատգամավորների հետ կառավարության խորհրդակցությունները շարունակվում են, դրանց մասնակցում են խորհրդարանական բոլոր խմբակցությունների ներկայացուցիչները՝ բացառությամբ լեյբորիստների, որոնք վարչապետին մեղադրել են անգործունակության մեջ։

7or.am