Հատուկ քննչական ծառայության քննիչի որոշմամբ՝ Գագիկ Ծառուկյանի կողմից անձամբ ձեռնարկատիրական գործունեությամբ զբաղվելու վերաբերյալ «Քաղաքացու որոշում» կուսակցության դիմումի հիման վրա նախապատրաստված նյութերով քրեական գործի հարուցումը մերժվել է:

Այս մասին ‹‹Փաստինֆո››-ի թղթակցին հայտնեցին Հատուկ քննչական ծառայության մամուլի քարտուղար Մարին Օհանջանյանը:

Նա տեղեկացրեց նաև, որ դիմումը մերժվել է հանցադեպի բացակայության հիմքով:

Հիշեցնենք, որ «Քաղաքացու որոշում» սոցիալ-դեմոկրատական կուսակցությունը դիմում էր ներկայացրել ՀՀ գլխավոր դատախազ Արթուր Դավթյանին և Ազգային ժողովի նախագահ Արարատ Միրզոյանին: Կուսակցությունը իրավապահներին ուղղված դիմումում մեջբերել էր ՀՀ Սահմանադրության 95-րդ հոդվածը, որը պատգամավորին արգելում է զբաղվել ձեռնարկատիրական գործունեությամբ։