Բոլիվիայի նախագահ Էվո Մորալեսը ի նշան բողոքի հացադուլ է հայտարարել՝ պահանջելով  խորհրդարանից,  այս տարվա դեկտեմբերի 6-ին  կայանալիք ընտրությունների մասին անհապաղ նոր օրենք ընդունել։ Ինչպես հայտնել է նախագահի պաշտոնական ներկայացուցիչը, Մորալեսը ակնկալում է, որ արտահերթ համապետական ընտրությունների անցկացումը կհաստատի Ազգային կոնգրեսը, քանի որ ժողովուրդը քվեարկել է նոր սահմանադրության օգտին։

Պատգամավորները առաջին ընթերցմամբ հավանության էին արժանացրել ընտրությունների մասին օրենքը, երբ ընդդիմության ներկայացուցիչների զգալի մասը լքել է  դահլիճը՝  նպատակ ունենալով զրկելԿոնգրեսին քվորում ապահովելու հնարավորությունից։  Հիմնական տարաձայնությունները կապված են բնիկ հնդակացիներին  Կոնգրեսում տրվելիք տեղերի և առաջին անգամ արտասահմանում ապրող 3 մլն. բոլիվիացիների քվեարկությանը մասնակցելու հետ։ Բոլիվիայի նոր սահմանադրությունը լայն իրավասություններ է ընձեռում բնիկ հնդկացի ազգաբնակչությանը, որը նախկինի համեմատ, ավելի  շատ պետք է ներկայացված լինի իշխանության տարբեր օղակներում։ Նոր օրենքով պետական վերահսկողության տակ են անցնում տնտեսության առանցքային ճյուղերը, բնական ռեսուրսները հայտարարվում են ազգային սեփականություն, երկրի նահանգները  լայն ինքնավարություն են ստանում։