Երևանում Բրիտանական և Գերմանիայի դեսպանատները Առաջին համաշխարհային պատերազմի 100-ամյա տարելիցի առիթով՝ հոկտեմբերի 31-ից դեկտեմբերի 5-ը համատեղ խորհրդանշական միջոցառումներ են անցկացնում:

Այս ծրագրի շրջանակում հերթական միջոցառումը տեղի կունենա նոյեմբերի 21-ին ժամը 19։00-ին: Կոմիտասի անվան Կամերային երաժշտության տանը երկու դեսպանատների հրավերով համերգով հանդես կգան «Դաշնամուրային ճակատամարտ» (Piano Battle) գերմանական խմբի կատարողներ Պաուլ Ցիբիսն ու Անդրեաս Քերնը:

Նրանք ներկայացնելու են յուրահատուկ համերգ-ներկայացում, որի ընթացքում նվագելով գերմանական ու բրիտանական դասական և ժամանակակից կատարումներ, ինչպես նաև այլ երաժշտական ստեղծագործություններ՝ երաժիշտները մրցելու են միմյանց հետ՝ խնդրելով հանդիսատեսին քվեարկել որևէ մեկի օգտին: