ԱՄՆ նախագահ Բարաք Օբաման կարծում է, որ ամերիկյան իշխանությունների կողմից ծրագրավորվող հարաբերությունների լավացումը Կուբայի հետ թույլ կտա Վաշինգտոնին ավելի մեծ ազդեցություն ունենալ այդ երկրի վրա։ Այս մասին նա նախօրեին հայտարարել է «АВС» հեռուստաընկերության լրագրողներին տված հարցազրույցում։
Լրագրողի հարցին՝ արդյոք Կուբայում բռնատիրությո՞ւն է, Օբաման պատասխանել է. «Այդ երկիրը միակուսակցական համակարգով է։ Սակայն պետք է հիշել, որ այդպիսին են նաև Չինաստանն ու Վիետնամը»։

«Սակայն մենք եկել ենք այն եզրահանգման, որ մենք ավելի մեծ ազդեցություն ունենք իրադարձությունների ընթացքի վրա, երբ մենք այդ երկրներում գործող դեսպան ունենք...», – ընդգծել է Սպիտակ տան ղեկավարը։ Նա նաև նշել է, որ Կուբայում «սերունդների փոփոխություն տեղի կունենա»։
Ինչպես նշել է ԱՄՆ վարչակազմի պաշտոնական ներկայացուցիչը, Վաշինգտոնը մտադիր է թուլացնել Կուբայի դեմ կիրառվող առևտրային էմբարգոն և վերականգնել դիվանագիտական հարաբերությունները Հավանայի հետ։
Օբաման չի բացառել իր այցը Կուբա։

Տեղեկացնում է «ՏԱՍՍ»–ը։