Որտե՞ղ էին Վրաստանի անվտանգության մարմինները, երբ անցյալ տարի Աջարիայում ստեղծվել էր իսլամական կայք (islam.georgia.com), որի միջոցով վրացերենով տարածվում էր «Իսլամական պետութուն» ահաբեկչական կազմակերպության գաղափարախոսությունը: Ո՞ւր էին Վրաստանի անվտանգության մարմինները, երբ Ծալկայի մահմեդականների հոգևոր առաջնորդ Մուրման Պաիչաձեն իրենց քթի տակից գնաց միացավ իսլամիստ ահաբեկիչներին, և նոյեմբերի 10-ին, արդեն որպես Աբու Ասիյա Ալ-Ջուեջ, վերոնշյալ կայքի միջոցով կոչ արեց Վրաստանի մուսուլմաններին միանալու Իսլամական պետությանը:
Ինչո՞վ էին մտածում նույն անվտանգության մարմինները, երբ այդ կայքի ստեղծումից մեկ շաբաթ անց աջար իրավապաշտպան Թամազ Չագալիձեն միացավ ահաբեկիչներին և Ահմեդ Ալ-Գյուրջի անվան տակ սպառնաց սպանել Աջարիայի բոլոր անհավատներին և կոչ արեց Վրաստանի մահմեդականներին միանալ ջիհադականներին: Եվ, փաստորեն, միանում են: Մեկ ու կես տարի էր պետք, որ կայքն արգելափակեին, գործ հարուցեին և հասկանային, որ ահաբեկիչները միայն Պանկիսի կիրճում չեն: Ընդ որում՝ այդ կայքը միակը չէ, որ վրացերենով տարածում է ռադիկալ իսլամիզմ:
Լավ, ի՞նչ են անելու Վրաստանի անվտանգության մարմիններն ու մնացած բոլոր մարմինները, երբ ահաբեկիչների մի մասն ինչ-որ կերպ վերադառնա Վրաստան ու շարունակի գաղափարախոսական աշխատանքները: Մի՞թե էլի շարունակելու են բան ու գործ թողած՝ հայկական շրջանակներում սեպարատիստներ փնտրել: Է՞լ ինչ է պետք՝ հասկանալու համար, թե ովքեր են իրական սեպարատիստներն ու նրանց հովանավորները։

«Ջավախք» երիտասարդական միության նախագահ

Արտյուշ Գրիգորյանի ֆեյսբուքյան էջից