ՀՀ ՏԿԱԻՆ Միգրացիոն պետական ծառայության ղեկավար Գագիկ Եգանյանի խոսքերով՝ ՌԴ մուտք գործելու արգելք ունեցող ավելի քան 5500 հայաստանցի դիմել է Միգրացիոն ծառայությանը՝ խնդրելով համաներում իրականացնել և թույլատրել նորից մեկնել արտագնա աշխատանքի:

«ՌԴ-ից ուղարկված պատասխանների 25%-ը դրական է... կարելի է ասել՝ երեքից մեկին թույլատրվում է մեկնել ՌԴ»,–ասել է բանախոսը։

Եգանյանը նշել է, որ մուտքի արգելանքը դրվել է Ռուսաստանի օրենսդրության պահանջները խախտելու պատճառով։

«Խախտումները հիմնականում երկու տեսակ են. առաջինը միգրացիոն օրենսդրության պահանջների խախտումն է, օրինակ՝ նախատեսված է, որ անձը 30 օրվա ընթացքում հաշվառման պետք է կանգնի, և այդ մասին տեղեկացնի համապատասխան ծառայություններին: Երկրորդը վարչական իրավախախտումներն են՝ ճանապարհային երթևեկության կանոնների խախտումը. դա հիմք է մուտքը հետագայում արգելելու համար»,- հստակեցրել է Եգանյանը:

Լրագրողի հարցին՝ ԵՏՄ անդամակցությունն առավելություններ չի՞ տալիս ՀՀ քաղաքացիներին, բանախոսը պատասխանել է, որ այն ընդամենը դյուրացնում է աշխատանքային միգրանտների հետ կապված գործառույթները. օրինակ՝ եթե Տաջիկստանի քաղաքացին ցանկանում է Ռուսաստանում աշխատանքային գործունեություն ծավալել, ապա պարտավոր է քննություն հանձնել ռուսերենից, ՌԴ պատմությունից և սահմանադրական կարգից, 3 հիվանդության բացակայության մասին տեղեկանքներ ներկայացնել, պետական տուրք վճարել: Մինչդեռ, Հայաստանի քաղաքացին նշված պահանջներից ազատված է։

«Աշխատատեղ զբաղեցնելու հարցում մեր քաղաքացին և Ռուսաստանի քաղաքացին ունեն հավասար իրավունքներ»,–ասել է Եգանյանը։

7or.am