Սիրիայի հարցով ՄԱԿ հատուկ բանագնաց Սթաֆֆան դե Միսթուրան հույս է հայտնել, որ միջսիրիական բանակցությունները կվերսկսվեն մինչև փետրվարի 25-ը։ Այս մասին հայտնում է «РИА Новости» գործակալությունը։

«Բանակցությունները պետք է վերսկսվեն փետրվարի 25-ից ոչ ուշ, իսկ եթե հնարավոր է՝ ավելի շուտ»,-նշվում է հատուկ բանագնացի գրասենյակի տարածած հաղորդագրության մեջ։

Հիշեցնենք՝ նախօրեին Ժնևում ավարտվել է դե Միսթուրայի հանդիպումը Բանակցությունների հարցով սիրիական ընդդիմադիր բարձրագույն կոմիտեի ներկայացուցիչների հետ։

Սիրիայի կառավարության և սիրիական ընդդիմության միջև բանակցությունները մեկնարկել էին հունվարի 29-ին, և ակնկալվում էր, որ կտևեն 6 ամիս։

Նախօրեին դե Միսթուրան հայտարարել է, որ միջսիրիական բանակցություններում ժամանակավոր դադար է գրանցվել։

Նշվում է, որ Սիրիայի ընդդիմության պատվիրակությունն արդեն հեռացել է Ժնևից, իսկ պաշտոնական Դամասկոսն ընդդիմությանը մեղադրել է բանակցությունները տապալելու փորձի մեջ։ Ընդդիմությունն էլ իր հերթին մեղադրում է Դամասկոսին ու նրա դաշնակիցներին։

7or.am