Հայաստանի 33 համայնքներում տեղի են ունեցել ՏԻՄ ընտրություններ, ըստ ԿԸՀ տվյալների՝ 29-ում վերընտրվել են գործող համայնքապետերը, որոնցից 26-ը ՀՀԿ անդամներ են:

Այսօր լրագրողների հետ հանդիպմանը «Թրանսփարենսի Ինթերնեյշնլ» հակակոռուպցիոն կենտրոնի ընտրական ծրագրերի համակարգող Արմեն Գրիգորյանը, ով այս ընթացքում համակարգել է ՏԻՄ ընտրությունների դիտորդական առաքելությունը, ասել է, որ նախկին ընտրություններում գրանցված խախտումները եղել են նաև այս ընտրություններում.

-Ինչպես Սահմանադրական հանրաքվեի ժամանակ, այնպես էլ այս անգամ կրկին խոչընդոտներ են ստեղծվել դիտորդների համար ցուցակները ստուգելու առումով, ընտրատեղամասերում եղել են կուտակումներ: Խնդիրները, որոնք առկա էին նախկինում, շարունակում են մնալ, չեն լուծվել այն խնդիրները, որոնց մասին մենք բազմիցս բարձրաձայնել ենք,- «Vesti.am»–ի փոխանցմամբ՝ ասել է Գրիգորյանը՝ ընդգծելով, որ պետք է ավելացվեն վերահսկողության գործիքները, և պետք է ընտրատեղամասից էլ դուրս վերահսկողություն սահմանել:

«Իրազեկ քաղաքացիների միավորում» ՀԿ նախագահ Դանիել Իոաննիսյանը, ով եղել է որպես դիտորդ, ասել է, որ իրենք Հրազդանում շրջիկ խմբերով հետևել են ընտրությունների ընթացքին և ականատես են եղել անգամ քրեորեն պատժելի արարքների.

-Եղան դեպքեր, երբ դիտորդներին, ԶԼՄ ներկայացուցիչներին արգելվում էր ծանոթանալ ընտրողների ստորագրած ցուցակներին: Եղան բազմաթիվ դեպքեր, երբ երեկոյան 20:00-ից հետո ոստիկանությունը հանձնաժողովների նախագահների հետ միասին փորձում էր խոչընդոտել լրագրողների մուտքը ընտրատեղամաս,-ասել է նա՝ ընդգծելով, որ սովորաբար ընտրակաշառքների հետ կապված՝ իրենք ունենում են անանուն զանգեր, իսկ այս դեպքում եղել են կոնկրետ մարդիկ, ովքեր հստակ պատմել են, թե ինչքան ընտրակաշառք են իրենց տվել, ինչի համար և այս դեպքում ընտրակաշառք բաժանելու փաստն ապացուցված է:

«Քաղաքացիական պայմանագիր» կուսակցության փոխնախագահ Լենա Նազարյանն էլ նշել է, որ իրենց խնդիրն է եղել թույլ չտալ ընտրատեղամասերում այնպիսի ապօրինություններ, որոնք հնարավոր կդարձնեին կորցնել իրենց թեկնածուին տված ձայները, ինչը, ըստ նրա՝ իրենց հաջողվել է.

-Ամենայն պատասխանատվությամբ կարող եմ հայտնել, որ Սասուն Միքայելյանին տրված ոչ մի քվե չի կորել: Ընտրատեղամասերում չեն եղել այնպիսի խախտումներ, որոնց արդյունքում մենք կորցրել ենք մեր թեկնածուին տրված քվեները,-ասել է նա՝ հավելելով, որ իրենց մրցակից Արամ Դանիելյանն անազնիվ է գործել և բաժանել է ընտրակաշառք 10.000-50.000 դրամի սահմաններում, ինչը նշանակություն է ունեցել ընտրությունների արդյունքների վրա:

«Vesti.am»