Ավստրիայի և Թուրքիայի միջև ծագած դիվանագիտական լարվածությունը մեծացել է. Թուրքիան «խորհրդակցության նպատակով» հետ է կանչել Վիեննայում իր դեսպանին: Այս մասին հայտնում է «ermenihaber.am»–ը։

Թուրքիայի արտգործնախարար Մևլութ Չավուշօղլուն, մեկնաբանելով այս որոշումը, պատճառաբանել է, թե Ավստրիան վերածվել է Եվրոպայում հակաիսլամական կենտրոնի:

Չավուշօղլուն իր դժգոհությունն է հայտնել այն փաստի առթիվ, որ Ավստրիայում արգելվել էր Թուրքիային աջակցող խաղաղ ցույցի անցկացումը, իսկ ավելի ուշ Թուրքիայում ահաբեկչական խմբավորում համարվող «Քրդստանի աշխատավորական կուսակցության» կազմակերպած ցույցը Վիեննայում թույլատրվել էր:

Աղբյուրը հիշեցնում է՝ անցյալ շաբաթ էլ Վիեննայի օդանավակայանում «Kronen Zeitung» թերթի կողմից տեղադրվել էր հետևյալ հակաթուրքական հայտարարությունը. «Դուք գիտեի՞ք, որ Թուրքիան թույլ է տալիս սեռական հարաբերություններ ունենալ 15 տարին չլրացած երեխայի հետ»:

Թուրքիան խիստ արձագանք էր ցուցաբերել հայտարարությանը։

7or.am