Թբիլիսիի «Ինովա» կլինիկայում անսովոր վիրահատություն է անցկացվել. հիվանդի որովայնից վիրաբույժները դուրս են բերել ժանգոտած պինցետ, որն այնտեղ է գտնվել 25 տարի:

«25 տարի առաջ վիրահատվել է հիվանդի լեղապարկը, և այն ժամանակ պինցետը մնացել է որովայնի խոռոչում»,-ասում է օնկովիրաբույժ Իրակլի Տոդուան, որը հեռացրել է քառորդ դար առաջ մոռացված պինցետը: Նրա խոսքով՝ այդ 25 տարվա ընթացքում հիվանդին ոչինչ չի անհանգստացրել:

«Մեր կլինիկա նա դիմել էր բոլորովին այլ պաթոլոգիա բուժելու համար, և օտար մարմինրը մենք բոլորովին պատահական ենք հայտնաբերել, երբ մագնիսառեզոնանսային տոմոգրաֆիա ենք անցկացրել»,-ասում է բժիշկը:

«Ինովա» կլինիկան տրամադրել է նաև տխրահռչակ պինցետի լուսանկարը: Մարկերը պինցետի կողքն է դրված պատկերացում կազմելու համար, թե ինչ չափսեր ունի հիվանդի որովայնում մոռացված առարկան:

Աղբյուրը՝ jam-news.net