Աշխարհ

31.03.2018 14:54


Նոր խստացումներ ԱՄՆ-ի ներգաղթի ոլորոտում

Նոր խստացումներ ԱՄՆ-ի ներգաղթի ոլորոտում

ԱՄՆ-ի վարչակազմը շարունակում է խստացնել ներգաղթի ոլորտին առնչվող քաղաքականությունը: Առաջ քաշված նոր նախաձեռնությունները վերաբերում են անօրինական ներգաղթած հղի կանանց և ամերիկյան վիզաների համար բոլոր դիմորդներին:

Օրերս նախագահ Թրամփի վարչակազմը հայտարարել է, որ այսուհետ անօրինական փախստական հղի կանայք ազատ չեն արձակվի ներգաղթի վերահսկողության մարմինների կողմից, ինչպես դա տեղի էր ունենում նախկին նախագահ Օբամայի օրոք: Հիշեցնենք, որ 2016 թվականի որոշմամբ վերջիններս չպետք է ենթարկվեին կալանքի, այլ ազատ էին արձակվում նախքան դատական նիստը:

ԱՄՆ-ի ներգաղթի հարցերով գերատեսչության աշխատակիցները պարտավորվում են ուսումնասիրել բոլոր գործերը առանձին-առանձին՝ դրանց վերաբերյալ որոշումներ կայացնելու ընթացքում: Ըստ նոր կանոնակարգի, ազատ կարձակվեն միայն հղիության երրորդ ամսում կամ ավելին գտնվող կանայք:

ԱՄՆ-ի ներգաղթի հարցերով գերատեսչության ղեկավարի տեղակալ Ֆիլիպ Միլերը տեղեկացնում է, որ այս որոշումը համապատասխանում է նախագահ Թրամփի՝ ներգաղթի ոլորտում որդեգրած ավելի կոշտ քաղաքականությանը: Այս պահին 35 հղի կանայք գտնվում են կալանքի տակ: Ընդհանուր առմամբ, դեկտեմբեր ամսից ձերբակալվել է անօրինական ներգաղթած 506 հղի կին: Սակայն Միլերը դժվարացավ մանրամասնել վերջիններիս հետագա ճակատագրի մասին:

Ներգաղթյալ կանանց իրավունքներով զբաղվող կազմակերպությունները քննադատել են որոշումը՝ ընդգծելով, որ հղի կանանց կալանավորումը կարող է հոգեբանորեն ճնշել նրանց և ազդել վերջիններիս առողջական վիճակի վրա: Բացի այդ, կանանց իրավապաշտպանները հիշեցնում են, որ բազմաթիվ անօրինական ներգաղթած կանանց հղիությունն արդյունք է նրանց նկատմամբ բռնության և բռնաբարությունների: Նրանցից շատերը ներգաղթում են ապաստան խնդրելու համար: Միլերը նշել է, սակայն, որ բռնության ենթարկված կանայք ևս ազատ կարձակվեն:

Այս նոր որոշմանը դեմ են նաև դեմոկրատները՝ ընդգծելով մայրերին իրենց երեխաներից բաժանելու անթույլատրելիության մասին:

Բացի դրանից, ներգաղթի ոլորտում վարչակազմը հանդես է գալիս մեկ այլ նախաձեռնությամբ: ԱՄՆ-ի պետքարտուղարությունն առաջարկում է ուսումնասիրել վիզաների համար դիմող բոլոր դիմորդների սոցցանցերի անձնական էջերը:

Միացյալ Նահանգների մուտքի վիզա ստացող բոլոր դիմորդները լրացման թերթիկում պետք է գրանցեն վերջին 5 տարիների ընթացքում օգտագործած բոլոր սոցցանցերի իրենց անունները: Մոտ օրերին պետքարտուղարությունը կներկայացնի նախագիծը համապատասխան կառույցներին՝ որոշումը ընդունելու համար:

Բացի սոցցանցերի հաշիվներից, հաստատման դեպքում ամերիկյան վիզայի դիմորդները կպարտավորվեն ներկայացնել վերջին 5 տարիների ընթացքում նրանց բոլոր հեռախոսահամարները, էկելկտրոնային հասցեները և այլ երկրներ այցելելու մասին տեղեկությունը:

Դիվանագիտական կամ պաշտոնական վիզաների պարագայում սոցցանցերի հաշվեհամարների վերաբերյալ կարող է արվեն բացառություններ:

Աղբյուրը՝ Ամերիկայի ձայն

Այս խորագրի վերջին նյութերը