Ապրիլի 1-ին Հայ Առաքելական Սուրբ եկեղեցին Հիսոուս Քրիստոսի հարության՝ Սուրբ Զատկի տոնն է նշում։ Jnews-ը իր ընթերցողին է ներկայացնում ջավախքցիների տոնական սեղանից անպակաս երկու կերակրատեսակ։

Պաստեղով ձվածեղ

Անհրաժեշտ է՝ պաստեղ՝ մրգալավաշ, ձու, աղ և կարագ։

Ձուն կոտրել մանր կտորների բաժանած պաստեղի՝ թթի մրգալավաշի վրա, աղ ցանել, հարել և միասին լցնել դաղվող յուղի կամ կարագի մեջ, տարածել տապակով մեկ: Եփել մարմանդ կրակի վրա՝ փակ կափարիչով թավայի մեջ։ Այնուհետև ձվաձեղը շրջել, կարմրացնել մյուս կողմը ևս ու մատուցել:

Բրնձով և չրեղենով փլավ

Անհրաժեշտ է՝ լավաշ, չրերի տեսականի, չամիչ, բրինձ, ձու, կարագ և յուղ։

Կաթսայի մեջ 2 ճաշի գդալ յուղ դնել և վրան լավաշ փռել։ Ձուն հարել, հարած ձվին ավելացնել բրնձի 1/3-ը։ Լավաշով կաթսան դնել մարմանդ կրակի վրա, լցնել նախ հարած ձվի մեջ խառնած բրինձը, հարթեցնել մակերեսը։ Այնուհետև ավելացնել բրնձի մյուս մասը։ Կտրատել չրեղենը և չամիչի հետ կարագով տապակել։ Ստացված զանգվածը լցնել բրնձով կաթսայի մեջ։ Կաթսայի կափարիչը փաթաթել սրբիչով և ծածկել։ Եփել մարմանդ կրակի վրա։

Սուրբ Զատկի տոնական սեղանի կարևոր խորհուրդը, իհարկե, ներկած ձուն է, սակայն կան ավանդական ուտեստներ, որոնք գեղեցկացնում, յուրահատուկ համ ու հոտ են հաղորդում։