Բաթումիի նավահանգստի մի քանի տասնյակ աշխատակիցներ գործադուլ են սկսել՝ պահանջելով դադարեցնել կրճատումները: Այս մասին հայտնում է Ռուսթավի 2-ը: Ըստ հեռուստաընկերության տվյալի՝ բողոքողներից 12-ը հացադուլ են հայտարարել: Նրանք պահանջում են հանդիպում «Բաթումիի նավթային տերմինալ» ընկերության գլխավոր տնօրեն և Բաթումիի նավահանգստի սեփականատեր Մուրատ Ջումադիլաևեի հետ, քանի որ իմացել են, որ նավահանգստում սպասվում է աշխատակազմի վերակազմակերպում և կադրային կրճատում։

«Մեզ մոտ վերակազմակերպում է սպասվում, մենք ինչպես միշտ ուշ ենք իմանում, դրան հետևելու է կազմակերպություններ ուղղորդելը, նավահանգստից հեռանալը, մենք կտրականապես դեմ ենք դրան։ Ընդհանուր առմամբ, ուզում են 75 աշխատակցի կրճատել, արդեն 25 թոշակառուի են կրճատել»,-ասել է նավահանգստի աշխատակիցներից մեկը:

Նավահանգստի ղեկավարությունը հաստատել է, որ կադրային փոփոխություններ նախատեսված են, սակայն այս փուլում դրանք վերաբերելու են միայն թոշակառուներին: «Բաթումիի նավթային տերմինալ» կազմակերպությունը «Բաթումիի ծովային նավահանգիստ» բաց բաժնետիրական ընկերության արժեթղթերի 100% սեփականատերն է, իր հերթին «Բաթումիի նավթային տերմինալը» 2017-ի օգոստոսից պատկանում է ղազախական «KazTransOil» բաժնետիրական ընկերությանը:

Աղբյուրը՝ aliq.ge