Հայ ազգային կոնգրեսի համակարգող Լևոն Զուրաբյանից «7օր»-ը հետաքրքրվել է՝ եթե հայ-թուրքական ներկա գործընթացը տապալվի, ՀԱԿ-ը կողջունի՞ այդ փաստը։

-Ո՞նց կարող ենք մենք ողջունել տապալումը։ Մենք արդեն ասել ենք, որ տապալումը եղե՛լ է, և դատապարտել ենք այս իշխանություններին նրանց չհաշվարկված, ապաշնորհ «նախաձեռնողական» քաղաքականության համար,- պատասխանել է նա։-Մնացածն արդեն ուղղակի դեմքը փրկելու մարմնավարժություններն են։ Այսինքն, այստեղ մենք ո՛չ ողջունելու, ո՛չ դատապարտելու բան ունենք։ Քաղաքականությունը տապալված է, ձախողված է, մենք այդ քաղաքականության բոլոր արատները բացահայտ ներկայացրել ենք ժողովրդին, և սրանից հետո ի՞նչ պետք է լինի, մեզ այդքան չի էլ հետաքրքրում. դա արդեն ավարտված է։

«Ուրախ չե՞ք, որ աղետներ բերող այդ քաղաքականությունը տապալվել է» հարցին էլ Լ. Զուրաբյանն այսպես է պատասխանել.

-Անգամ տապալված քաղաքականությունն արդեն մեծ վնասներ գործել է հայ ժողովրդի համար։ Մենք ոչինչ ուրախանալու չունենք։ Ընդհանրապես, իշխանության տապալումից ուրախանալ պետք չէ. իշխանության տապալումն առաջին հերթին ժողովրդի տապալումն է։

7or.am