Մարտի 5-ի երեկոյան Ադրբեջանի նախագահ Իլհամ Ալիևը զանգահարել է Թուրքիայի նախագահ Աբդուլլա Գյուլին։ Ադրբեջանի նախագահի մամուլի ծառայությունից տեղեկացնում են, որ հեռախոսազրույցի ընթացքում Ի. Ալիևն ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի ընդունած բանաձևի կապակցությամբ իր բողոքն է հայտնել և դատապարտել այն։ Ադրբեջանի նախագահն այդ որոշումը բնութագրել է անարդարացի, պատմական ճշմարտությունը կոպտորեն խեղաթյուրող և տարածաշրջանում լարվածության խորացմանը նպաստող։ Նրա խոսքերով՝ Ադրբեջանը գտնվում է Թուրքիայի կողքին և շարունակում է ամբողջությամբ աջակցել նրան։

Իր հերթին Թուրքիայի նախագահը բարձր է գնահատել ադրբեջանցի գործընկերոջ դիրքորոշումը և իր երախտագիտությունը հայտնել։

Հեռախոսազրույցի ժամանակ խոսվել է նաև երկկողմ հարաբերությունների և տարածաշրջանային իրավիճակի մասին։