«The Global Political Trust Company» (www.global-polcomp.com) միջազգային հեղինակավոր կազմակերպությունը, որի անդամներն են արևմտյան քաղաքագիտական ճանաչված Think-Thank-երի անդամներ, Եվրասիական տարածաշրջանի համար 2019թ․ հունվարի 20-22-ը Շվեյցարիայի Բազել քաղաքում կազմակերպում է՝ «Ամենաբազմակուսակցական քաղաքական գործիչը» մրցանակաբաշխություն-փառատոն։

Մրցույթն անցկացվելու է երեք՝ 18-35տ․, 35-60տ․ և 60-ից բարձր տարիքային խմբերի համար, ինչպես նաև՝ երեք անվանակարգերով․

հաջողակ գործիչ (բարձր ղեկավար պաշտոնների հասած գործիչներ),

կիսահաջողակ գործիչ (պատգամավոր, նախարարի տեղակալ և այլն) և

անհաջողակ գործիչ (գործիչ ով չնայած կուսակցություններ փոխելուն՝ որևէ պաշտոն չի ստացել)։

Մրցույթին մասնակցելու հայտ կարող են ներկայացնել առնվազն երկու կուսակցություն փոխած գործիչները։ Մրցույթի ժյուրին մշակել է հատուկ չափանիշներ և մանրամասն քննարկելու է ինչպես երկրի ժողովրդավարության, իրավական, սոցիալական, մարդու իրավունքների վիճակը, այնպես էլ յուրաքանչյուր հայտատուի անձնական գործերը՝ գործիչի մասնագիտությունը (եթե այն առկա է), նրա և նրա ընտանիքի սոցիալական վիճակը, կուսակցափոխության պայմանները և շարժառիթները, հասած կարիերայի աստիճանը և այլն։

Հաղթողներին տրվելու են մեդալներ (ոսկե, արծաթե, բրոնզե) և դրամական պարգևներ։ Մրցույթին դիմելու վերջնաժամկետն է 2018թ․ դեկտեմբերի 18-ը։

Ավետիք Իշխանյանի ֆեյսբուքյան էջից