Ազգային ժողովի արտահերթ ընտրություններին մասնակցում է 11 ուժ:

Գերիշխում են երեք տիպի հանրային տրամադրություններ։

Թավշյա հեղափոխականները ձայն կտան Նիկոլ Փաշինյանի «Իմ քայլին»:

Հակահեղափոխականները կքվեարկեն ՀՀԿ-ի օգտին:

Արմատական հեղափոխականների փոքր շերտի ձայներն ակնկալում է «Սասնա ծռերը»:

Խորհրդարան կարող է անցնել նաև ԲՀԿ-ն՝ իներցիայի, փողի ու ռեյտինգային համակարգի շնորհիվ:

Այս խճանկարում մյուս ուժերն անելիք ու ասելիք չունեն: Նրանք ընդամենը ֆոնային դեր են կատարում ու ձայն են փախցնելու այս կամ այն շերտի ներկայացուցիչ ուժից (հիմնականում՝ «Իմ քայլից»): Իսկ դա նշանակում է, որ հազիվ թե Փաշինյանը կարողանա կրկնել Երևանի ավագանու ընտրությունների ժամանակ արձանագրած 81 տոկոսանոց ցուցանիշը:

Հիմնական ախոյաններ են ՀՀԿ-ն ու «Իմ քայլը»՝ դաշտը դարձնելով սև ու սպիտակ:

ՀՀԿ-ն ու «Իմ քայլը», ժողովրդական լեզվով ասած, իրար են ուտում, բայց չեն նկատում, որ կա իրենց մերժող ուժ:

Դատելով «Սասնա ծռերի» պահվածքից՝ Փաշինյանի իրական հակառակորդը ոչ թե ՀՀԿ-ն է, այլ «ծռերը»:

Պատահական չէ, որ Փաշինյանը կոպիտ արձագանքեց «ծռերի» հայտարարությանը՝ 2 տարուց խորհրդարանը ցրելու մասով։

«Սասնա ծռերը» մի փոքր նահանջեցին Փաշինյանի հայտարարությունից հետո, բայց թե ինչպիսին կլինեն նրանց հետագա հարաբերությունները, դժվար չէ կանխատեսել: Հայկական ժիրոնդիստների ու յակոբինյանների ջրերը չեն կարող մի առվով հոսել, ինչպես որ բոլշևիների ու Կերենսկու ջրերը մի առվով չհոսեցին:

Դեկտեմբերի 9-ից կսկսվի նոր գործընթաց, որն էլ կկանխորոշի Հայաստանի ապագան: Կսկսվի քաղաքական նոր դաշտի ձևավորումը:

7or.am