Աշխարհ

04.12.2018 14:01


Ալիևի նստավայրի մոտ էին հավաքվել լրտեսության մեղադրանքով ձերբակալված զինծառայողների հարազատները

Ալիևի նստավայրի մոտ էին հավաքվել լրտեսության մեղադրանքով ձերբակալված զինծառայողների հարազատները

Հայաստանի օգտին լրտեսության մեղադրանքով ձերբակալված զինծառայողների հարազատները հերթական անգամ հավաքվել էին Ադրբեջանի նախագահի նստավայրի մոտ՝ քրեական գործերը վերանայելու, երիտասարդների նկատմամբ իրականացված խոշտանգումները հետաքննելու և մեղավորներին պատժելու պահանջով:

«Ազատության» ադրբեջանական ծառայության հետ զրույցում նրանք պնդում էին, որ զինվորները անհիմն են ձերբակալվել, և որ նրանցից մի քանիսն անգամ հետաքննության ընթացքում կտտանքների զոհ են դարձել:

Առեղծվածային այս պատմության մեջ ներգրավված զինծառայողների հարազատները արդեն հինգերորդ անգամ են դիմում Իլհամ Ալիևին ՝ խնդրելով լսել իրենց բողոքը և պարզաբանումներ տալ:

Անցյալ տարվա մայիսին Ադրբեջանի իրավապահ և ուժային մարմինները համատեղ հաղորդագրություն էին տարածել՝ հայտնելով զինվորականների շրջանում զանգվածային ձերբակալությունների մասին: Պաշտոնական աղբյուրների համաձայն՝ ձերբակալվածները Հայաստանի օգտին լրտեսություն են իրականացրել, նրանց մեղադրանք է առաջադրվել պետական դավաճանության հոդվածով: Թե քանի հոգի է ձերբակալվել, ինչ ապացույցներով են առաջնորդվել իրավապահները հատուկ գործողություն իրականացնելիս, չէր հաղորդվել: Ադրբեջանական որոշ լրատվամիջոցներ որոշ տեղեկություններ այդուհանդերձ հայթայթել էին, սակայն հրապարակելուց անմիջապես հետո հրավիրվել էին գլխավոր դատախազություն և նկատողություն ստացել:

Այդ լրատվամիջոցները, վկայակոչելով սեփական աղբյուրները, հայտնել էին, որ ձերբակալվածներից վեց հոգու ինքնությունը պարզել են, նրանցից հինգը մահացել են անհայտ հանգամանքներում, մեկի ճակատագիրն անհայտ է: Ալիևի վարչակազմի ընդդիմախոսների պնդմամբ՝ դավաճանության մեջ մեղադրվող այդ անձանց նկատմամբ արտադատարանական մահապատիժ է իրականացվել:

Գործի շրջանակում 10 տարվա ազատազրկման դատապարտված Մաջիդ Գասիմովի հայրը՝ Քյամիլ Գասիմովը պնդում է՝ որդին անմեղ է: Նրա խոսքով՝ ձերբակալությունից հետո որդուն խոշտանգել են և մահամերձ վիճակում ստիպել ինչ-որ փաստաթղթեր ստորագրել:

Վալիդա Ահմեդովայի խոսքով, իր որդին՝ Էլչին Գուլիևը նույնպես մահացել է իրավապահների գործողությունների հետևանքով: «Նրանց սպանել են, որպեսզի իրականությունը մյուսներին չպատմեն: Ով էլ ողջ է մնացել՝ հոգեկան խնդիրներ ունի»,-ասել է Ահմեդովան:

Ի տարբերություն Վալիդա Ահմեդովայի, ով գիտի, թե ինչ հանգամանքներում է մահացել որդին, բողոքի ակցիային մասնակից սևազգեստ ծնողներից շատերը դա էլ չգիտեն: Նրանք եկել էին նախագահ Ալիևից պահանջելու պարզաբանել մութ ու ողբերգական պատմության հանգամանքները: Ծնողները պատմում են, որ պետական դավաճանության մեջ մեղավոր ճանաչված իրենց զինծառայող որդիները շատ դեպքերում ճաղերի ետևում սպանվել և թաղվել են պատահական վայրերում՝ գերեզմանատներից դուրս:

Աղբյուրը՝ Ազատություն

Այս խորագրի վերջին նյութերը