Հանրության բոլոր շերտերն իրենց տեսնում էին իշխանափոխության շահառուների մեջ, բայց իրական շահառուները եղան նեղ շրջանակներ։

Մի կարևոր դիտարկում. Սերժ Սարգսյանի հրաժարականի պահանջն, ի թիվս այլի, պայմանավորված էր նրանով, որ մարդիկ, հոգնելով ստից, մերժեցին այդ սուտը և այն համակարգը, որը կառուցվել էր դրա շուրջ: Դրան էլ գումարած՝ մարդկանց մոտ չկար այլևս որևիցե սպասում Սերժ Սարգսյանից:

Ի տարբերություն դրա՝ այսօր Նիկոլ Փաշինյանից դեռ կա շատ մեծ սպասում, բայց ամեն չկատարած խոստում/սուտ (արագաչափերի և կարմիր գծերի վերացում, պարտադիր կուտակայինի վերացում, սուպերվարչապետական լիազորությունների կրճատում) և ամեն անարդարություն (Աննա Հակոբյանի 23-ամյա բարեկամին պաշտոնի նշանակում, ՀԴՄ-ական տեռոր փոքր բիզնեսի դեմ) տանելու է իշխանության վարկանիշի անկմանը:

Հանրության բոլոր շերտերը 2018-ի ապրիլին իրենց տեսնում էին իշխանափոխության շահառուների մեջ (տաքսիստից մինչ ապրիլյան պատերազմի մասնակից), և քանի որ իշխանությունը օբյեկտիվ կամ սուբյեկտիվ պատճառներով չի կարող (կամ ունակ չէ) իրենց բոլորի խնդիրները միանգամից լուծել, նրա վարկանիշն ընկնելու է: Դա բնական է: Մնում է, որ նոր իշխանափոխությունը նույնպես պետության համար առանց մեծ ցնցումների անցնի (խոսքը կոնկրետ իշխանափոխության քաղաքական գործընթացների մասին է):

Բենիամին Մաթևոսյանի ֆեյսբուքյան էջից