ԱՄՆ-ի Տեխաս նահանգի «Fort Worth» բազայում այս օրերին ուսումնական թռիչքներ են սկսել իրականացնել ամերիկյան նոր սերնդի F-35 ռազմական ինքնաթիռները։ Դրանք պետք է մատակարարվեն Թուրքիային, սակայն առայժմ կմնան ԱՄՆ-ում, քանի որ թուրք օդաչուները շուրջ 1 տարի դեռ պիտի համապատասխան փորձաշրջան ու դասընթացներ անցնեն։

2018-ի հունիսի 21-ին ԱՄՆ-ում կազմակերպվել էր արարողություն, որի ընթացքում Թուրքիային էին հանձնվել երկու հատ F-35 ինքնաթիռ։ Այդ ինքնաթիռները նույնպես չէին ուղարկվել Թուրքիա, քանի որ օդաչուները պետք է պատրաստություն անցնեին։

Այս պահին Թուրքիան դեռևս չի ստացել որևէ F-35: Այդ ինքնաթիռների մատակարարման հետ կապված առկա են մի շարք խնդիրներ Թուրքիայի և ԱՄՆ-ի միջև։ Մի քանի օր առաջ Թրամփը ստորագրել էր օրենք, ըստ որի, եթե Թուրքիան Ռուսաստանից ստանա S-400 զենիթահթրռային ՀՕՊ համակարգերը, ապա ԱՄՆ-ն չի մատակարարի մնացած ինքնաթիռները։

Եթե, այնուամենայնիվ, Թուրքիան գնի S-400-ները Ռուսաստանից, ապա Թրամփի ընդունած օրենքը չի անդրադառնալու Թուրքիային արդեն իսկ հանձնված, բայց դեռևս ԱՄՆ-ում գտնվող առաջին երկու F-35-երի վրա։

Ըստ թուրք-ամերիկյան պայմանագրի՝ Թուրքիան մինչև 2020թ. ավարտը պետք է ստանա ընդհանուր 100 միավոր F-35:

Տեղեկացնենք, որ F-35 կործանիչներն իրենց առաջին թռիչքները կատարել են 2006-ին։ Առավելագույն արագությունը 1930 կմ/ժ է, թռիչքի հեռավորությունը՝ 2200 կմ։ Ինքնաթիռները կարող են կրել «օդ-օդ», «օդ-մակերևույթ» և հականավային հրթիռներ, տարատեսակ ռումբեր։