Ադրբեջանի արտգործնախարար էլմար Մամեդյարովը տարին ամփոփող հարցազրույց է տվել ադրբեջանական ԶԼՄ-ներին, որի ժամանակ, ի թիվս այլնի, անդրադարձել է նաև Ղարաբաղյան հակամարտության թեմային:

Ադրբեջանի արտգործնախարարը, մասնավորապես, նշել է, որ չնայած այս տարի ԼՂ հակամարտության կարգավորման շուրջ ընթացող բանակցություններում հստակ առաջընթաց չի նկատվել, բայց չի կարելի ասել, որ դրանք «փակուղի են մտել», փոխանցում է Minval.az կայքը:

«Բազմաթիվ հանդիպումները և հստակ նախաձեռնությունները, որոնք առաջ են քաշվել այս տարվա ընթացքում, ցույց են տալիս բանակցային գործընթացը շարունակելու անհրաժեշտությունը: Մենք միշտ հայտարարել ենք, որ քանի դեռ հնարավորություն կա խաղաղ ճանապարհով և բանակցությունների միջոցով լուծելու հակամարտությունը, մենք կօգտագործենք այդ հնարավորությունը: Իհարկե, դրա նպատակն այն է, որ առարկայական բանակցությունների միջոցով առաջ տանենք գործընթացը»,-նշել է Ադրբեջանի արտգործնախարարը:

Մամեդյարովը նշել է նաև, որ Հայաստանի կողմից բարձրացվող անվտանգության և կարգավիճակի մասին հարցերը պետք է լուծվեն կարգավորման գործընթացի շրջանակում ԵԱՀԿ-ի համապատասխան որոշումների համաձայն, ինչպես նաև համաձայն ՄԱԿ-ի բանաձևերի, որոնք վաղեմության ժամկետ չունեն: Արտգործնախարարը նշել է նաև, որ հնարավոր չի համարում քննարկել կարգավիճակի հարցն առանց Ղարաբաղի ադրբեջանական բնակչության վերադարձի:

Նա նշել է նաև, որ եթե անգամ հակամարտությունը կրկին բռնկվի, բանակցությունները հետագայում նորից կշարունակվեն, որովհետև «չի լինում ո՛չ հավերժական պատերազմ, ո՛չ հավերժական բանակցություններ»: Նրա խոսքով` իրենք բանակցություններ են վարում «Ադրբեջանի օկուպացված տարածքներն ազատելու համար»:

Մամեդյարովը նշել է նաև, որ «Հայաստանի ագրեսիվ քաղաքականության հետևանքով» երկու երկրների միջև չկան դիվանագիտական հարաբերություններ, այդ իսկ պատճառով բանակցությունները վարվում են միջնորդ երկրների միջոցով:

Աղբյուրը՝ Tert.am