ՀՀ Ազգային ժողովի հայտարարությունների ժամին հանդես գալով հայտարարությամբ ԲՀԿ խմբակցության պատգամավոր Ռուբեն Գևորգյանն անդրադարձել է ժողովուրդների դժգոհության ալիքի բարձրացմանը, մասնավորապես նշելով, որ աշխարհում այդ ալիքը բարձրացել է սոցիալական հողի վրա և հայերն էլ անմասն չեն մնացել նման ալիքներից, սակայն դրանք ուղղված են եղել տվյալ հասարակարգի դեմ: Նա նշել է, որ 1988թ. համազգային շարժումը սովետական հասարակարգի դեմ էր, որն անկախության պայքար էր:

-Այսօր էլ, անհնար է, որ մեր նման ժողովուրդը քաղաքական դաշտում գոյություն ունեցող ընդվզումները հասցնի պայթյունավտանգ վիճակի` գլխավոր թեման դարձնելով հացի խնդիրը: Այլ բան է, երբ խնդիրները լինեն հայ մարդու բարոյական արժեքների ու նորմերր ոտնահարման և հայ մարդուն ոչ հարիր գործող ռեժիմի գոյությանը,- ասել է Ռուբեն Գևորգյանը և հավելել, որ նման հասունացում հայ հասարակության մեջ չի կարող լինել:

Նա նշել է, որ ամեն ազգ ունի իր ճակատագիրը և ապրում է իր ճակատագրով:

-Մինչև հայ մարդուն վայել բարեկեցիկ կյանք կերտելը դեռ ավելի բարդ խնդիրներ ունենք լուծելու թշնամիներով շրջապատված այս տարածաշրջանում,- նշել է նա:

Նա ընդգծել է, որ այսօր հայ ժողովրդից պահանջվում է զինվել համբերությամբ, լինել զգոն և միասնական թշնամիներով շրջապատված Հայաստանն անառիկ պահելու համար:

Ինչ վերաբերում է Ադրբեջանի` պատերազմ վերսկսելու վերաբերյալ հայտարարություններին, նա նշել է, որ այդ տեսակը զուրկ է գիտակցությունից, որ ժողովուրդների մեծությունն ու հզորությունը չի չափվում նրանց թվաքանակով:

-Այսօր մեր մեջ պետք է գերիշխի հավաքական լինելու կամքն ու գիտակցումը, որ բոլորս միասին մասնակից լինենք քաղաքական հոգևարգի մեջ հայտնված Ադրբեջանի կողմից մեր հանդեպ որդեգրած քաղաքականության հոգեհանգստին, հակառակ պարագայում դժվար կլինի ասել, թե այս կարևոր և պատասխանատու ժամանակահատվածում արժեքների ինչպիսի կորուստներ կունենանք,- իր ելույթը եզրափակել է Ռուբեն Գևորգյանը:

7or.am