Լրահոս

09.04.2011 14:00


Արմավիրի դեպքի առնչությամբ քրեկան գործ է հարուցվել

Արմավիրի դեպքի առնչությամբ քրեկան գործ է հարուցվել

Այսօր մամուլում տեղեկություն էր տարածվել, որ Արմավիրում հերթական արյունոտ միջադեպն է գրանցվել՝ «ԱԺ պատգամավոր Ռուստամ Գասպարյանի քրոջ որդին դանակահարել է Արմավիրի քաղաքապետ Ռուբեն Խլղաթյանի եղբոր որդուն։ Վերջինիս տեղափոխել են հիվանանոց, վիրահատել, սակայն վիճակը ծանր է, նա կյանքի համար վտանգավոր վնասվածքներ է ստացել»։

Ժամեր անց ոստիկանությունը դեպքի կապակցությամբ պաշտոնական հաղորդագրություն է տարածել.

«Ապրիլի 8-ին, ժամը 19.05-ին, հիվանդանոցից  ոստիկանության Արմավիրի բաժնում հաղորդում էր ստացվել, որ գլխի գագաթային մասի սալջարդով իրենց մոտ բուժօգնության է դիմել 1980 թ. ծնված Կամո Խլղաթյանը: Նա հայտնել էր, որ վնասվածքն ստացել է փողոցում վայր ընկնելու հետևանքով:

Ձեռնարկված միջոցառումների շնորհիվ պարզվել է, որ նույն օրը, ժամը 19.00-ի սահմաններում, Արմավիրի Երևանյան փողոցում գործող «Լեգենդա» բենզալցակայանի մոտ, վիճաբանության ժամանակ, անհայտ անձինք ծեծի են ենթարկել Կ. Խլղաթյանին:

Բենզալցակայանում և հարակից տարածքներում տեղադրված տեսախցիկների տեսագրություններն ուսումնասիրելուց հետո պարզվել է, որ հիշյալ օրը, ժամը 18.56-ի սահմաններում, Ջանֆիդա գյուղի բնակիչներ՝ 1984 թ. ծնված Սուրեն Սուքիասյանը, 10-րդ դասարանի աշակերտ Է. Գ.-ն, 1983 թ. ծնված Աշոտ Մանուկյանը, 1984 թ. ծնված Գագիկ Մանուկյանը, 1983 թ. ծնված Արտակ Պապոյանը և դեռևս չպարզված այլ անձինք, ծեծի են ենթարկել Կ. Խլղաթյանին և նրա եղբորը` 1977 թ. ծնված Գոռ Խլղաթյանին:

Ծեծկռտուքի ընթացքում Ս. Սուքիասյանն իր անվամբ գրանցված «Ատմաչա» գազային ատրճանակով երկու անգամ կրակել է:

Ապրիլի 9-ին Արտակ Պապոյանը բերման է ենթարկվել:

Ձեռնարկվում են միջոցառումներ միջադեպի մյուս մասնակիցների ինքնությունը պարզելու և հայտնաբերելու ուղղությամբ:

Փաստի առթիվ ոստիկանության Արմավիրի քննչական բաժնում հարուցվել է քրեական գործ ՀՀ քրեական օրենսգրքի 258 հոդվածի (Խուլիգանությունը) 4-րդ մասով:

Նախաքննությունը շարունակվում է»:

7or.am

Այս խորագրի վերջին նյութերը