Կասկած չկա, որ Հայաստանի երկրորդ նախագահ Ռոբերտ Քոչարյանի դեմ քրեական գործը հարուցվել է քաղաքական դրդապատճառներով: Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը` պատասխանելով հարցին` կարո՞ղ է արդյոք Քոչարյանի դեմ հարուցված քրեական գործը կապված լինել Արցախի հետ:

«Դա ակնհայտ էր ի սկզբանե: Որո՞նք էին քրեական գործի հարուցման քաղաքական դրդապատճառները, ո՞ւմ էր պետք այս քաղաքական հետապնդումը, ի՞նչ նպատակներ էին նրանք հետապնդում. սրանք այն հարցերն են, որոնց պետք է պատասխանեն ոչ թե փաստաբանները, այլ քաղաքական գործիչները` գնահատական տալով կատարվածին»,-ասաց փաստաբանը:

Ալումյանը հիշեցրեց երկրորդ նախագահի խոսքերը` «բանտում լինեմ, թե ազատության մեջ` ամեն ինչ անելու եմ, որպեսզի խանգարեմ Արցախի հանձնման փորձերին», եւ խորհուրդ տվեց հետագա պարզաբանումների համար դիմել Ռոբերտ Քոչարյանին, եթե այդպիսի հնարավորություն լինի:

Աղբյուրը՝ news.am