Երևանում Նիկոլ Փաշինյանի հրաժարականի պահանջով ակցիա է։ Քաղաքացիները փակում են Երևանի մետրոյի կայարանները։ Քաղաքացիական անհնազանդության մասին Tert.am-ի հետ զրույցում ասաց ՀՀԿ֊ական Հայկ Մամիջանյանը։

«Սա քաղաքացիական անհնազանդություն է, մետրոպոլիտենի աշխատանքը կաթվածահար է»։

Երևանի մետրոպոլիտենի ֆեյսբուքյան էջը հաղորդագրություն է տարածել, որում ասված է․

«Հարգելի՛ ուղևորներ,

քաղաքացիական անհնազանդության ակցիաների շրջանակում այսօր՝ ժամը 09:08-ին, կաթվածահար է եղել Կարեն Դեմիրճյանի անվան Երևանի մետրոպոլիտենի բնականոն երթևեկությունը։

Մետրոպոլիտենի կայարաններում քաղաքացիները իրականացնում են անհնազանդության ակցիա՝ խափանելով մետրոպոլիտենի երթևեկությունը։

Բնականոն աշխատանքին անցնելուն պես՝ կտրվի լրացուցիչ ինֆորմացիա»։

***

Ժամը 09:45-ի դրությամբ վերսկսվել է Կարեն Դեմիրճյանի անվան Երևանի մետրոպոլիտենի բնականոն աշխատանքը, հայտնում է մետրոպոլիտենի մամուլի քարտուղար Տաթև Խաչատրյանը: